Zec 4:1 א וישב המלאך הדבר בי ויעירני כאיש אשר יעור משנתו
Zec 4:2 ב ויאמר אלי מה אתה ראה ויאמר (ואמר) ראיתי והנה מנורת זהב כלה וגלה על ראשה ושבעה נרתיה עליה--שבעה ושבעה מוצקות לנרות אשר על ראשה
Zec 4:3 ג ושנים זיתים עליה  אחד מימין הגלה ואחד על שמאלה
Zec 4:4 ד ואען ואמר אל המלאך הדבר בי לאמר  מה אלה אדני
Zec 4:5 ה ויען המלאך הדבר בי ויאמר אלי הלוא ידעת מה המה אלה ואמר לא אדני
Zec 4:6 ו ויען ויאמר אלי לאמר זה דבר יהוה אל זרבבל לאמר  לא בחיל ולא בכח--כי אם ברוחי אמר יהוה צבאות
Zec 4:7 ז מי אתה הר הגדול לפני זרבבל למישר והוציא את האבן הראשה--תשאות חן חן לה  {פ}
Zec 4:8 ח ויהי דבר יהוה אלי לאמר
Zec 4:9 ט ידי זרבבל יסדו הבית הזה--וידיו תבצענה וידעת כי יהוה צבאות שלחני אליכם
Zec 4:10 י כי מי בז ליום קטנות ושמחו וראו את האבן הבדיל ביד זרבבל שבעה אלה עיני יהוה המה משוטטים בכל הארץ
Zec 4:11 יא ואען ואמר אליו  מה שני הזיתים האלה על ימין המנורה ועל שמאולה
Zec 4:12 יב ואען שנית ואמר אליו  מה שתי שבלי הזיתים אשר ביד שני צנתרות הזהב המריקים מעליהם הזהב
Zec 4:13 יג ויאמר אלי לאמר הלוא ידעת מה אלה ואמר לא אדני
Zec 4:14 יד ויאמר אלה שני בני היצהר העמדים על אדון כל הארץ