Nah 1:1 א משא נינוה--ספר חזון נחום האלקשי
Nah 1:2 ב אל קנוא ונקם יהוה נקם יהוה ובעל חמה נקם יהוה לצריו ונוטר הוא לאיביו
Nah 1:3 ג יהוה ארך אפים וגדול (וגדל) כח ונקה לא ינקה יהוה בסופה ובשערה דרכו וענן אבק רגליו
Nah 1:4 ד גוער בים ויבשהו וכל הנהרות החריב אמלל בשן וכרמל ופרח לבנון אמלל
Nah 1:5 ה הרים רעשו ממנו והגבעות התמגגו ותשא הארץ מפניו ותבל וכל יושבי בה
Nah 1:6 ו לפני זעמו מי יעמוד ומי יקום בחרון אפו חמתו נתכה כאש והצרים נתצו ממנו
Nah 1:7 ז טוב יהוה למעוז ביום צרה וידע חסי בו
Nah 1:8 ח ובשטף עבר כלה יעשה מקומה ואיביו ירדף חשך
Nah 1:9 ט מה תחשבון אל יהוה--כלה הוא עשה לא תקום פעמים צרה
Nah 1:10 י כי עד סירים סבכים וכסבאם סבואים אכלו--כקש יבש מלא
Nah 1:11 יא ממך יצא חשב על יהוה רעה--יעץ בליעל  {ס}
Nah 1:12 יב כה אמר יהוה אם שלמים וכן רבים וכן נגוזו ועבר וענתך--לא אענך עוד
Nah 1:13 יג ועתה אשבר מטהו מעליך ומוסרתיך אנתק
Nah 1:14 יד וצוה עליך יהוה לא יזרע משמך עוד מבית אלהיך אכרית פסל ומסכה אשים קברך--כי קלות  {פ}
Nah 1:15