Mic 2:1 א הוי חשבי און ופעלי רע על משכבותם באור הבקר יעשוה כי יש לאל ידם
Mic 2:2 ב וחמדו שדות וגזלו ובתים ונשאו ועשקו גבר וביתו ואיש ונחלתו  {פ}
Mic 2:3 ג לכן כה אמר יהוה הנני חשב על המשפחה הזאת רעה  אשר לא תמישו משם צוארתיכם ולא תלכו רומה--כי עת רעה היא
Mic 2:4 ד ביום ההוא ישא עליכם משל ונהה נהי נהיה אמר שדוד נשדנו--חלק עמי ימיר איך ימיש לי לשובב שדינו יחלק
Mic 2:5 ה לכן לא יהיה לך משליך חבל בגורל בקהל יהוה
Mic 2:6 ו אל תטפו יטיפון לא יטפו לאלה לא יסג כלמות
Mic 2:7 ז האמור בית יעקב הקצר רוח יהוה--אם אלה מעלליו הלוא דברי ייטיבו עם הישר הלך
Mic 2:8 ח ואתמול עמי לאויב יקומם ממול שלמה אדר תפשטון מעברים בטח שובי מלחמה
Mic 2:9 ט נשי עמי תגרשון מבית תענגיה מעל עלליה תקחו הדרי לעולם
Mic 2:10 י קומו ולכו כי לא זאת המנוחה בעבור טמאה תחבל וחבל נמרץ
Mic 2:11 יא לו איש הלך רוח ושקר כזב אטף לך ליין ולשכר והיה מטיף העם הזה
Mic 2:12 יב אסף אאסף יעקב כלך קבץ אקבץ שארית ישראל--יחד אשימנו כצאן בצרה  כעדר בתוך הדברו תהימנה מאדם
Mic 2:13 יג עלה הפרץ לפניהם--פרצו ויעברו שער ויצאו בו ויעבר מלכם לפניהם ויהוה בראשם  {פ}