Allepo, Amos, Chapter 06

Amos 6:1 א הוי השאננים בציון והבטחים בהר שמרון נקבי ראשית הגוים ובאו להם בית ישראל
Amos 6:2 ב עברו כלנה וראו ולכו משם חמת רבה ורדו גת פלשתים הטובים מן הממלכות האלה--אם רב גבולם מגבלכם
Amos 6:3 ג המנדים ליום רע ותגשון שבת חמס
Amos 6:4 ד השכבים על מטות שן וסרחים על ערשותם ואכלים כרים מצאן ועגלים מתוך מרבק
Amos 6:5 ה הפרטים על פי הנבל כדויד חשבו להם כלי שיר
Amos 6:6 ו השתים במזרקי יין וראשית שמנים ימשחו ולא נחלו על שבר יוסף
Amos 6:7 ז לכן עתה יגלו בראש גלים וסר מרזח סרוחים
Amos 6:8 ח נשבע אדני יהוה בנפשו נאם יהוה אלהי צבאות מתאב אנכי את גאון יעקב וארמנתיו שנאתי והסגרתי עיר ומלאה
Amos 6:9 ט והיה אם יותרו עשרה אנשים בבית אחד--ומתו
Amos 6:10 י ונשאו דודו ומסרפו להוציא עצמים מן הבית ואמר לאשר בירכתי הבית העוד עמך ואמר אפס ואמר הס כי לא להזכיר בשם יהוה  {ס}
Amos 6:11 יא כי הנה יהוה מצוה והכה הבית הגדול רסיסים והבית הקטן בקעים
Amos 6:12 יב הירצון בסלע סוסים אם יחרוש בבקרים  כי הפכתם לראש משפט ופרי צדקה ללענה
Amos 6:13 יג השמחים ללא דבר  האמרים--הלוא בחזקנו לקחנו לנו קרנים
Amos 6:14 יד כי הנני מקים עליכם בית ישראל נאם יהוה אלהי הצבאות--גוי ולחצו אתכם מלבוא חמת עד נחל הערבה  {פ}