Amos 5:1 א שמעו את הדבר הזה אשר אנכי נשא עליכם קינה--בית ישראל
Amos 5:2 ב נפלה לא תוסיף קום בתולת ישראל נטשה על אדמתה אין מקימה
Amos 5:3 ג כי כה אמר אדני יהוה העיר היצאת אלף תשאיר מאה והיוצאת מאה תשאיר עשרה לבית ישראל
Amos 5:4 ד כי כה אמר יהוה לבית ישראל  דרשוני וחיו
Amos 5:5 ה ואל תדרשו בית אל והגלגל לא תבאו ובאר שבע לא תעברו  כי הגלגל גלה יגלה ובית אל יהיה לאון
Amos 5:6 ו דרשו את יהוה וחיו  פן יצלח כאש בית יוסף ואכלה ואין מכבה לבית אל
Amos 5:7 ז ההפכים ללענה משפט וצדקה לארץ הניחו
Amos 5:8 ח עשה כימה וכסיל והפך לבקר צלמות ויום לילה החשיך הקורא למי הים וישפכם על פני הארץ--יהוה שמו
Amos 5:9 ט המבליג שד על עז ושד על מבצר יבוא
Amos 5:10 י שנאו בשער מוכיח ודבר תמים יתעבו
Amos 5:11 יא לכן יען בושסכם על דל ומשאת בר תקחו ממנו--בתי גזית בניתם ולא תשבו בם כרמי חמד נטעתם ולא תשתו את יינם
Amos 5:12 יב כי ידעתי רבים פשעיכם ועצמים חטאתיכם צררי צדיק לקחי כפר ואביונים בשער הטו
Amos 5:13 יג לכן המשכיל בעת ההיא--ידם  כי עת רעה היא
Amos 5:14 יד דרשו טוב ואל רע למען תחיו ויהי כן יהוה אלהי צבאות אתכם--כאשר אמרתם
Amos 5:15 טו שנאו רע ואהבו טוב והציגו בשער משפט אולי יחנן יהוה אלהי צבאות--שארית יוסף  {ס}
Amos 5:16 טז לכן כה אמר יהוה אלהי צבאות אדני בכל רחבות מספד ובכל חוצות יאמרו הו הו וקראו אכר אל אבל ומספד אל יודעי נהי
Amos 5:17 יז ובכל כרמים מספד  כי אעבר בקרבך אמר יהוה  {פ}
Amos 5:18 יח הוי המתאוים את יום יהוה  למה זה לכם יום יהוה הוא חשך ולא אור
Amos 5:19 יט כאשר ינוס איש מפני הארי ופגעו הדב ובא הבית--וסמך ידו על הקיר ונשכו הנחש
Amos 5:20 כ הלא חשך יום יהוה ולא אור ואפל ולא נגה לו
Amos 5:21 כא שנאתי מאסתי חגיכם ולא אריח בעצרתיכם
Amos 5:22 כב כי אם תעלו לי עלות ומנחתיכם לא ארצה ושלם מריאיכם לא אביט
Amos 5:23 כג הסר מעלי המון שריך וזמרת נבליך לא אשמע
Amos 5:24 כד ויגל כמים משפט וצדקה כנחל איתן
Amos 5:25 כה הזבחים ומנחה הגשתם לי במדבר ארבעים שנה--בית ישראל
Amos 5:26 כו ונשאתם את סכות מלככם ואת כיון צלמיכם--כוכב אלהיכם אשר עשיתם לכם
Amos 5:27 כז והגליתי אתכם מהלאה לדמשק  אמר יהוה אלהי צבאות שמו  {פ}