Joe 1:1 א דבר יהוה אשר היה אל יואל בן פתואל
Joe 1:2 ב שמעו זאת הזקנים והאזינו כל יושבי הארץ ההיתה זאת בימיכם ואם בימי אבתיכם
Joe 1:3 ג עליה לבניכם ספרו ובניכם לבניהם ובניהם לדור אחר
Joe 1:4 ד יתר הגזם אכל הארבה ויתר הארבה אכל הילק ויתר הילק אכל החסיל
Joe 1:5 ה הקיצו שכורים ובכו והיללו כל שתי יין על עסיס כי נכרת מפיכם
Joe 1:6 ו כי גוי עלה על ארצי עצום ואין מספר שניו שני אריה ומתלעות לביא לו
Joe 1:7 ז שם גפני לשמה ותאנתי לקצפה חשף חשפה והשליך הלבינו שריגיה
Joe 1:8 ח אלי כבתולה חגרת שק על בעל נעוריה
Joe 1:9 ט הכרת מנחה ונסך מבית יהוה אבלו הכהנים משרתי יהוה
Joe 1:10 י שדד שדה אבלה אדמה  כי שדד דגן הוביש תירוש אמלל יצהר
Joe 1:11 יא הבישו אכרים הילילו כרמים על חטה ועל שערה  כי אבד קציר שדה
Joe 1:12 יב הגפן הובישה והתאנה אמללה רמון גם תמר ותפוח כל עצי השדה יבשו--כי הביש ששון מן בני אדם  {ס}
Joe 1:13 יג חגרו וספדו הכהנים הילילו משרתי מזבח--באו לינו בשקים משרתי אלהי  כי נמנע מבית אלהיכם מנחה ונסך
Joe 1:14 יד קדשו צום קראו עצרה--אספו זקנים כל ישבי הארץ בית יהוה אלהיכם וזעקו אל יהוה
Joe 1:15 טו אהה ליום  כי קרוב יום יהוה וכשד משדי יבוא
Joe 1:16 טז הלוא נגד עינינו אכל נכרת מבית אלהינו שמחה וגיל
Joe 1:17 יז עבשו פרדות תחת מגרפתיהם--נשמו אצרות נהרסו ממגרות  כי הביש דגן
Joe 1:18 יח מה נאנחה בהמה נבכו עדרי בקר--כי אין מרעה להם גם עדרי הצאן נאשמו
Joe 1:19 יט אליך יהוה אקרא  כי אש אכלה נאות מדבר ולהבה להטה כל עצי השדה
Joe 1:20 כ גם בהמות שדה תערוג אליך  כי יבשו אפיקי מים ואש אכלה נאות המדבר  {ס}