Eze 28:1 א ויהי דבר יהוה אלי לאמר
Eze 28:2 ב בן אדם אמר לנגיד צר כה אמר אדני יהוה יען גבה לבך ותאמר אל אני--מושב אלהים ישבתי בלב ימים ואתה אדם ולא אל ותתן לבך כלב אלהים
Eze 28:3 ג הנה חכם אתה מדנאל (מדניאל)  כל סתום לא עממוך
Eze 28:4 ד בחכמתך ובתבונתך עשית לך חיל ותעש זהב וכסף באוצרותיך
Eze 28:5 ה ברב חכמתך ברכלתך הרבית חילך ויגבה לבבך בחילך  {ס}
Eze 28:6 ו לכן כה אמר אדני יהוה  יען תתך את לבבך כלב אלהים
Eze 28:7 ז לכן הנני מביא עליך זרים--עריצי גוים והריקו חרבותם על יפי חכמתך וחללו יפעתך
Eze 28:8 ח לשחת יורדוך ומתה ממותי חלל בלב ימים
Eze 28:9 ט האמר תאמר אלהים אני לפני הרגך  ואתה אדם ולא אל ביד מחלליך
Eze 28:10 י מותי ערלים תמות ביד זרים  כי אני דברתי נאם אדני יהוה  {פ}
Eze 28:11 יא ויהי דבר יהוה אלי לאמר
Eze 28:12 יב בן אדם שא קינה על מלך צור ואמרת לו כה אמר אדני יהוה אתה חותם תכנית מלא חכמה וכליל יפי
Eze 28:13 יג בעדן גן אלהים היית כל אבן יקרה מסכתך אדם פטדה ויהלם תרשיש שהם וישפה ספיר נפך וברקת וזהב מלאכת תפיך ונקביך בך ביום הבראך כוננו
Eze 28:14 יד את כרוב--ממשח הסוכך ונתתיך בהר קדש אלהים היית--בתוך אבני אש התהלכת
Eze 28:15 טו תמים אתה בדרכיך מיום הבראך עד נמצא עולתה בך
Eze 28:16 טז ברב רכלתך מלו תוכך חמס--ותחטא ואחללך מהר אלהים ואבדך כרוב הסכך מתוך אבני אש
Eze 28:17 יז גבה לבך ביפיך שחת חכמתך על יפעתך על ארץ השלכתיך לפני מלכים נתתיך--לראוה בך
Eze 28:18 יח מרב עוניך בעול רכלתך חללת מקדשיך ואוצא אש מתוכך היא אכלתך ואתנך לאפר על הארץ לעיני כל ראיך
Eze 28:19 יט כל יודעיך בעמים שממו עליך בלהות היית ואינך עד עולם  {פ}
Eze 28:20 כ ויהי דבר יהוה אלי לאמר
Eze 28:21 כא בן אדם שים פניך אל צידון והנבא עליה
Eze 28:22 כב ואמרת כה אמר אדני יהוה הנני עליך צידון ונכבדתי בתוכך וידעו כי אני יהוה בעשותי בה שפטים--ונקדשתי בה
Eze 28:23 כג ושלחתי בה דבר ודם בחוצותיה ונפלל חלל בתוכה בחרב עליה מסביב וידעו כי אני יהוה
Eze 28:24 כד ולא יהיה עוד לבית ישראל סלון ממאיר וקוץ מכאב מכל סביבתם השאטים אותם וידעו כי אני אדני יהוה  {פ}
Eze 28:25 כה כה אמר אדני יהוה בקבצי את בית ישראל מן העמים אשר נפצו בם ונקדשתי בם לעיני הגוים וישבו על אדמתם אשר נתתי לעבדי ליעקב
Eze 28:26 כו וישבו עליה לבטח ובנו בתים ונטעו כרמים וישבו לבטח  בעשותי שפטים בכל השאטים אתם מסביבותם--וידעו כי אני יהוה אלהיהם  {פ}