Eze 22:1 א ויהי דבר יהוה אלי לאמר
Eze 22:2 ב ואתה בן אדם התשפט התשפט את עיר הדמים והודעתה את כל תועבותיה
Eze 22:3 ג ואמרת כה אמר אדני יהוה עיר שפכת דם בתוכה לבוא עתה ועשתה גלולים עליה לטמאה
Eze 22:4 ד בדמך אשר שפכת אשמת ובגלוליך אשר עשית טמאת ותקריבי ימיך ותבוא עד שנותיך על כן נתתיך חרפה לגוים וקלסה לכל הארצות
Eze 22:5 ה הקרבות והרחקות ממך יתקלסו בך--טמאת השם רבת המהומה
Eze 22:6 ו הנה נשיאי ישראל איש לזרעו היו בך למען שפך דם
Eze 22:7 ז אב ואם הקלו בך לגר עשו בעשק בתוכך יתום ואלמנה הונו בך
Eze 22:8 ח קדשי בזית ואת שבתתי חללת
Eze 22:9 ט אנשי רכיל היו בך למען שפך דם ואל ההרים אכלו בך זמה עשו בתוכך
Eze 22:10 י ערות אב גלה בך טמאת הנדה ענו בך
Eze 22:11 יא ואיש את אשת רעהו עשה תועבה ואיש את כלתו טמא בזמה ואיש את אחתו בת אביו ענה בך
Eze 22:12 יב שחד לקחו בך למען שפך דם נשך ותרבית לקחת ותבצעי רעיך בעשק ואתי שכחת נאם אדני יהוה
Eze 22:13 יג והנה הכיתי כפי אל בצעך אשר עשית ועל דמך אשר היו בתוכך
Eze 22:14 יד היעמד לבך אם תחזקנה ידיך לימים אשר אני עשה אותך אני יהוה דברתי ועשיתי
Eze 22:15 טו והפיצותי אותך בגוים וזריתיך בארצות והתמתי טמאתך ממך
Eze 22:16 טז ונחלת בך לעיני גוים וידעת כי אני יהוה  {פ}
Eze 22:17 יז ויהי דבר יהוה אלי לאמר
Eze 22:18 יח בן אדם היו לי בית ישראל לסוג (לסיג)  כלם נחשת ובדיל וברזל ועופרת בתוך כור--סגים כסף היו  {ס}
Eze 22:19 יט לכן כה אמר אדני יהוה יען היות כלכם לסגים לכן הנני קבץ אתכם אל תוך ירושלם
Eze 22:20 כ קבצת כסף ונחשת וברזל ועופרת ובדיל אל תוך כור לפחת עליו אש להנתיך כן אקבץ באפי ובחמתי והנחתי והתכתי אתכם
Eze 22:21 כא וכנסתי אתכם ונפחתי עליכם באש עברתי ונתכתם בתוכה
Eze 22:22 כב כהתוך כסף בתוך כור כן תתכו בתוכה וידעתם כי אני יהוה שפכתי חמתי עליכם  {פ}
Eze 22:23 כג ויהי דבר יהוה אלי לאמר
Eze 22:24 כד בן אדם--אמר לה את ארץ לא מטהרה היא  לא גשמה ביום זעם
Eze 22:25 כה קשר נביאיה בתוכה כארי שואג טרף טרף נפש אכלו חסן ויקר יקחו--אלמנותיה הרבו בתוכה
Eze 22:26 כו כהניה חמסו תורתי ויחללו קדשי--בין קדש לחל לא הבדילו ובין הטמא לטהור לא הודיעו ומשבתותי העלימו עיניהם ואחל בתוכם
Eze 22:27 כז שריה בקרבה כזאבים טרפי טרף--לשפך דם לאבד נפשות למען בצע בצע
Eze 22:28 כח ונביאיה טחו להם תפל--חזים שוא וקסמים להם כזב אמרים כה אמר אדני יהוה ויהוה לא דבר
Eze 22:29 כט עם הארץ עשקו עשק וגזלו גזל ועני ואביון הונו ואת הגר עשקו בלא משפט
Eze 22:30 ל ואבקש מהם איש גדר גדר ועמד בפרץ לפני בעד הארץ--לבלתי שחתה ולא מצאתי
Eze 22:31 לא ואשפך עליהם זעמי באש עברתי כליתים דרכם בראשם נתתי נאם אדני יהוה  {פ}