Jer 18:1 א הדבר אשר היה אל ירמיהו מאת יהוה לאמר
Jer 18:2 ב קום וירדת בית היוצר ושמה אשמיעך את דברי
Jer 18:3 ג וארד בית היוצר והנהו (והנה הוא) עשה מלאכה על האבנים
Jer 18:4 ד ונשחת הכלי אשר הוא עשה בחמר--ביד היוצר ושב ויעשהו כלי אחר כאשר ישר בעיני היוצר לעשות  {ס}
Jer 18:5 ה ויהי דבר יהוה אלי לאמור
Jer 18:6 ו הכיוצר הזה לא אוכל לעשות לכם בית ישראל--נאם יהוה הנה כחמר ביד היוצר כן אתם בידי בית ישראל  {ס}
Jer 18:7 ז רגע אדבר על גוי ועל ממלכה לנתוש ולנתוץ ולהאביד
Jer 18:8 ח ושב הגוי ההוא מרעתו אשר דברתי עליו--ונחמתי על הרעה אשר חשבתי לעשות לו  {ס}
Jer 18:9 ט ורגע אדבר על גוי ועל ממלכה לבנות ולנטוע
Jer 18:10 י ועשה הרעה (הרע) בעיני לבלתי שמע בקולי--ונחמתי על הטובה אשר אמרתי להיטיב אותו  {ס}
Jer 18:11 יא ועתה אמר נא אל איש יהודה ועל יושבי ירושלם לאמר כה אמר יהוה הנה אנכי יוצר עליכם רעה וחשב עליכם מחשבה שובו נא איש מדרכו הרעה והיטיבו דרכיכם ומעלליכם
Jer 18:12 יב ואמרו נואש  כי אחרי מחשבותינו נלך ואיש שררות לבו הרע נעשה  {פ}
Jer 18:13 יג לכן כה אמר יהוה שאלו נא בגוים מי שמע כאלה  שעררת עשתה מאד בתולת ישראל
Jer 18:14 יד היעזב מצור שדי שלג לבנון  אם ינתשו מים זרים קרים--נוזלים
Jer 18:15 טו כי שכחני עמי לשוא יקטרו ויכשלום בדרכיהם שבילי עולם ללכת נתיבות דרך לא סלולה
Jer 18:16 טז לשום ארצם לשמה שרוקת (שריקת) עולם כל עובר עליה ישם ויניד בראשו
Jer 18:17 יז כרוח קדים אפיצם לפני אויב ערף ולא פנים אראם ביום אידם  {ס}
Jer 18:18 יח ויאמרו לכו ונחשבה על ירמיהו מחשבות--כי לא תאבד תורה מכהן ועצה מחכם ודבר מנביא לכו ונכהו בלשון ואל נקשיבה אל כל דבריו
Jer 18:19 יט הקשיבה יהוה אלי ושמע לקול יריבי
Jer 18:20 כ הישלם תחת טובה רעה כי כרו שוחה לנפשי זכר עמדי לפניך לדבר עליהם טובה להשיב את חמתך מהם
Jer 18:21 כא לכן תן את בניהם לרעב והגרם על ידי חרב ותהינה נשיהם שכלות ואלמנות ואנשיהם יהיו הרגי מות בחוריהם מכי חרב במלחמה
Jer 18:22 כב תשמע זעקה מבתיהם כי תביא עליהם גדוד פתאם  כי כרו שיחה (שוחה) ללכדני ופחים טמנו לרגלי
Jer 18:23 כג ואתה יהוה ידעת את כל עצתם עלי למות--אל תכפר על עונם וחטאתם מלפניך אל תמחי והיו (ויהיו) מכשלים לפניך בעת אפך עשה בהם  {ס}