Allepo, Jeremiah, Chapter 10

Jer 10:1 א שמעו את הדבר אשר דבר יהוה עליכם--בית ישראל
Jer 10:2 ב כה אמר יהוה אל דרך הגוים אל תלמדו ומאתות השמים אל תחתו  כי יחתו הגוים מהמה
Jer 10:3 ג כי חקות העמים הבל הוא  כי עץ מיער כרתו מעשה ידי חרש במעצד
Jer 10:4 ד בכסף ובזהב ייפהו במסמרות ובמקבות יחזקום ולוא יפיק
Jer 10:5 ה כתמר מקשה המה ולא ידברו נשוא ינשוא כי לא יצעדו אל תיראו מהם כי לא ירעו וגם היטיב אין אותם  {פ}
Jer 10:6 ו מאין כמוך יהוה  גדול אתה וגדול שמך בגבורה
Jer 10:7 ז מי לא יראך מלך הגוים כי לך יאתה  כי בכל חכמי הגוים ובכל מלכותם מאין כמוך
Jer 10:8 ח ובאחת יבערו ויכסלו מוסר הבלים עץ הוא
Jer 10:9 ט כסף מרקע מתרשיש יובא וזהב מאופז--מעשה חרש וידי צורף תכלת וארגמן לבושם מעשה חכמים כלם
Jer 10:10 י ויהוה אלהים אמת הוא אלהים חיים ומלך עולם מקצפו תרעש הארץ ולא יכלו גוים זעמו  {פ}
Jer 10:11 יא כדנה תאמרון להום אלהיא די שמיא וארקא לא עבדו יאבדו מארעא ומן תחות שמיא אלה  {ס}
Jer 10:12 יב עשה ארץ בכחו מכין תבל בחכמתו ובתבונתו נטה שמים
Jer 10:13 יג לקול תתו המון מים בשמים ויעלה נשאים מקצה ארץ (הארץ) ברקים למטר עשה ויוצא רוח מאצרתיו
Jer 10:14 יד נבער כל אדם מדעת הביש כל צורף מפסל  כי שקר נסכו ולא רוח בם
Jer 10:15 טו הבל המה מעשה תעתעים בעת פקדתם יאבדו
Jer 10:16 טז לא כאלה חלק יעקב כי יוצר הכל הוא וישראל שבט נחלתו  יהוה צבאות שמו  {ס}
Jer 10:17 יז אספי מארץ כנעתך--ישבתי (ישבת) במצור  {ס}
Jer 10:18 יח כי כה אמר יהוה הנני קולע את יושבי הארץ בפעם הזאת והצרתי להם למען ימצאו  {ס}
Jer 10:19 יט אוי לי על שברי נחלה מכתי ואני אמרתי אך זה חלי ואשאנו
Jer 10:20 כ אהלי שדד וכל מיתרי נתקו בני יצאני ואינם--אין נטה עוד אהלי ומקים יריעותי
Jer 10:21 כא כי נבערו הרעים ואת יהוה לא דרשו על כן לא השכילו וכל מרעיתם נפוצה  {פ}
Jer 10:22 כב קול שמועה הנה באה ורעש גדול מארץ צפון  לשום את ערי יהודה שממה--מעון תנים  {ס}
Jer 10:23 כג ידעתי יהוה כי לא לאדם דרכו לא לאיש הלך והכין את צעדו
Jer 10:24 כד יסרני יהוה אך במשפט  אל באפך פן תמעטני
Jer 10:25 כה שפך חמתך על הגוים אשר לא ידעוך ועל משפחות אשר בשמך לא קראו  כי אכלו את יעקב ואכלהו ויכלהו ואת נוהו השמו  {פ}