Isa 63:1 א מי זה בא מאדום חמוץ בגדים מבצרה זה הדור בלבושו צעה ברב כחו אני מדבר בצדקה רב להושיע
Isa 63:2 ב מדוע אדם ללבושך ובגדיך כדרך בגת
Isa 63:3 ג פורה דרכתי לבדי ומעמים אין איש אתי ואדרכם באפי וארמסם בחמתי ויז נצחם על בגדי וכל מלבושי אגאלתי
Isa 63:4 ד כי יום נקם בלבי ושנת גאולי באה
Isa 63:5 ה ואביט ואין עזר ואשתומם ואין סומך ותושע לי זרעי וחמתי היא סמכתני
Isa 63:6 ו ואבוס עמים באפי ואשכרם בחמתי ואוריד לארץ נצחם  {ס}
Isa 63:7 ז חסדי יהוה אזכיר תהלת יהוה כעל כל אשר גמלנו יהוה ורב טוב לבית ישראל אשר גמלם כרחמיו וכרב חסדיו
Isa 63:8 ח ויאמר אך עמי המה בנים לא ישקרו ויהי להם למושיע
Isa 63:9 ט בכל צרתם לא (לו) צר ומלאך פניו הושיעם--באהבתו ובחמלתו הוא גאלם וינטלם וינשאם כל ימי עולם
Isa 63:10 י והמה מרו ועצבו את רוח קדשו ויהפך להם לאויב הוא נלחם בם
Isa 63:11 יא ויזכר ימי עולם משה עמו איה המעלם מים את רעי צאנו--איה השם בקרבו את רוח קדשו
Isa 63:12 יב מוליך לימין משה זרוע תפארתו בוקע מים מפניהם לעשות לו שם עולם
Isa 63:13 יג מוליכם בתהמות כסוס במדבר לא יכשלו
Isa 63:14 יד כבהמה בבקעה תרד רוח יהוה תניחנו--כן נהגת עמך לעשות לך שם תפארת
Isa 63:15 טו הבט משמים וראה מזבל קדשך ותפארתך  איה קנאתך וגבורתך המון מעיך ורחמיך אלי התאפקו
Isa 63:16 טז כי אתה אבינו--כי אברהם לא ידענו וישראל לא יכירנו  אתה יהוה אבינו גאלנו מעולם שמך
Isa 63:17 יז למה תתענו יהוה מדרכיך תקשיח לבנו מיראתך שוב למען עבדיך שבטי נחלתך
Isa 63:18 יח למצער ירשו עם קדשך צרינו בוססו מקדשך
Isa 63:19 יט היינו מעולם לא משלת בם--לא נקרא שמך עליהם לוא קרעת שמים ירדת מפניך הרים נזלו