Allepo, Isaiah, Chapter 52

Isa 52:1 א עורי עורי לבשי עזך ציון  לבשי בגדי תפארתך ירושלם עיר הקדש--כי לא יוסיף יבא בך עוד ערל וטמא
Isa 52:2 ב התנערי מעפר קומי שבי ירושלם התפתחו (התפתחי) מוסרי צוארך שביה בת ציון  {ס}
Isa 52:3 ג כי כה אמר יהוה חנם נמכרתם ולא בכסף תגאלו  {ס}
Isa 52:4 ד כי כה אמר אדני יהוה מצרים ירד עמי בראשנה לגור שם ואשור באפס עשקו
Isa 52:5 ה ועתה מה לי פה נאם יהוה כי לקח עמי חנם משלו יהילילו נאם יהוה ותמיד כל היום שמי מנאץ
Isa 52:6 ו לכן ידע עמי שמי לכן ביום ההוא כי אני הוא המדבר הנני  {ס}
Isa 52:7 ז מה נאוו על ההרים רגלי מבשר משמיע שלום מבשר טוב--משמיע ישועה אמר לציון מלך אלהיך
Isa 52:8 ח קול צפיך נשאו קול יחדו ירננו  כי עין בעין יראו בשוב יהוה ציון
Isa 52:9 ט פצחו רננו יחדו חרבות ירושלם  כי נחם יהוה עמו גאל ירושלם
Isa 52:10 י חשף יהוה את זרוע קדשו לעיני כל הגוים וראו כל אפסי ארץ את ישועת אלהינו  {ס}
Isa 52:11 יא סורו סורו צאו משם טמא אל תגעו צאו מתוכה--הברו נשאי כלי יהוה
Isa 52:12 יב כי לא בחפזון תצאו ובמנוסה לא תלכון  כי הלך לפניכם יהוה ומאספכם אלהי ישראל  {ס}
Isa 52:13 יג הנה ישכיל עבדי ירום ונשא וגבה מאד
Isa 52:14 יד כאשר שממו עליך רבים כן משחת מאיש מראהו ותארו מבני אדם
Isa 52:15 טו כן יזה גוים רבים עליו יקפצו מלכים פיהם  כי אשר לא ספר להם ראו ואשר לא שמעו התבוננו  {ס}