Isa 48:1 א שמעו זאת בית יעקב הנקראים בשם ישראל וממי יהודה יצאו הנשבעים בשם יהוה ובאלהי ישראל יזכירו--לא באמת ולא בצדקה
Isa 48:2 ב כי מעיר הקדש נקראו ועל אלהי ישראל נסמכו  יהוה צבאות שמו  {ס}
Isa 48:3 ג הראשנות מאז הגדתי ומפי יצאו ואשמיעם פתאם עשיתי ותבאנה
Isa 48:4 ד מדעתי כי קשה אתה וגיד ברזל ערפך ומצחך נחושה
Isa 48:5 ה ואגיד לך מאז בטרם תבוא השמעתיך--פן תאמר עצבי עשם ופסלי ונסכי צום
Isa 48:6 ו שמעת חזה כלה ואתם הלוא תגידו  השמעתיך חדשות מעתה ונצרות ולא ידעתם
Isa 48:7 ז עתה נבראו ולא מאז ולפני יום ולא שמעתם--פן תאמר הנה ידעתין
Isa 48:8 ח גם לא שמעת גם לא ידעת--גם מאז לא פתחה אזנך  כי ידעתי בגוד תבגוד ופשע מבטן קרא לך
Isa 48:9 ט למען שמי אאריך אפי ותהלתי אחטם לך--לבלתי הכריתך
Isa 48:10 י הנה צרפתיך ולא בכסף בחרתיך בכור עני
Isa 48:11 יא למעני למעני אעשה כי איך יחל וכבודי לאחר לא אתן  {פ}
Isa 48:12 יב שמע אלי יעקב וישראל מקראי  אני הוא אני ראשון אף אני אחרון
Isa 48:13 יג אף ידי יסדה ארץ וימיני טפחה שמים קרא אני אליהם יעמדו יחדו
Isa 48:14 יד הקבצו כלכם ושמעו מי בהם הגיד את אלה יהוה אהבו--יעשה חפצו בבבל וזרעו כשדים
Isa 48:15 טו אני אני דברתי אף קראתיו הבאתיו והצליח דרכו
Isa 48:16 טז קרבו אלי שמעו זאת לא מראש בסתר דברתי--מעת היותה שם אני ועתה אדני יהוה שלחני--ורוחו  {פ}
Isa 48:17 יז כה אמר יהוה גאלך קדוש ישראל  אני יהוה אלהיך מלמדך להועיל מדריכך בדרך תלך
Isa 48:18 יח לוא הקשבת למצותי ויהי כנהר שלומך וצדקתך כגלי הים
Isa 48:19 יט ויהי כחול זרעך וצאצאי מעיך כמעתיו לא יכרת ולא ישמד שמו מלפני  {ס}
Isa 48:20 כ צאו מבבל ברחו מכשדים בקול רנה הגידו השמיעו זאת הוציאוה עד קצה הארץ אמרו גאל יהוה עבדו יעקב
Isa 48:21 כא ולא צמאו בחרבות הוליכם--מים מצור הזיל למו ויבקע צור--ויזבו מים
Isa 48:22 כב אין שלום אמר יהוה לרשעים  {פ}