Allepo, Isaiah, Chapter 46

Isa 46:1 א כרע בל קרס נבו--היו עצביהם לחיה ולבהמה נשאתיכם עמוסות משא לעיפה
Isa 46:2 ב קרסו כרעו יחדו לא יכלו מלט משא ונפשם בשבי הלכה  {פ}
Isa 46:3 ג שמעו אלי בית יעקב וכל שארית בית ישראל--העמסים מני בטן הנשאים מני רחם
Isa 46:4 ד ועד זקנה אני הוא ועד שיבה אני אסבל אני עשיתי ואני אשא ואני אסבל ואמלט  {ס}
Isa 46:5 ה למי תדמיוני ותשוו ותמשלוני ונדמה
Isa 46:6 ו הזלים זהב מכיס וכסף בקנה ישקלו ישכרו צורף ויעשהו אל יסגדו אף ישתחוו
Isa 46:7 ז ישאהו על כתף יסבלהו ויניחהו תחתיו ויעמד--ממקומו לא ימיש אף יצעק אליו ולא יענה מצרתו לא יושיענו  {ס}
Isa 46:8 ח זכרו זאת והתאששו השיבו פושעים על לב
Isa 46:9 ט זכרו ראשנות מעולם  כי אנכי אל ואין עוד אלהים ואפס כמוני
Isa 46:10 י מגיד מראשית אחרית ומקדם אשר לא נעשו אמר עצתי תקום וכל חפצי אעשה
Isa 46:11 יא קרא ממזרח עיט מארץ מרחק איש עצתו (עצתי) אף דברתי אף אביאנה--יצרתי אף אעשנה  {ס}
Isa 46:12 יב שמעו אלי אבירי לב--הרחוקים מצדקה
Isa 46:13 יג קרבתי צדקתי לא תרחק ותשועתי לא תאחר ונתתי בציון תשועה לישראל תפארתי  {ס}