Allepo, Isaiah, Chapter 43

Isa 43:1 א ועתה כה אמר יהוה בראך יעקב ויצרך ישראל  אל תירא כי גאלתיך קראתי בשמך לי אתה
Isa 43:2 ב כי תעבר במים אתך אני ובנהרות לא ישטפוך  כי תלך במו אש לא תכוה ולהבה לא תבער בך
Isa 43:3 ג כי אני יהוה אלהיך קדוש ישראל מושיעך נתתי כפרך מצרים כוש וסבא תחתיך
Isa 43:4 ד מאשר יקרת בעיני נכבדת ואני אהבתיך ואתן אדם תחתיך ולאמים תחת נפשך
Isa 43:5 ה אל תירא כי אתך אני  ממזרח אביא זרעך וממערב אקבצך
Isa 43:6 ו אמר לצפון תני ולתימן אל תכלאי הביאי בני מרחוק ובנותי מקצה הארץ
Isa 43:7 ז כל הנקרא בשמי ולכבודי בראתיו  יצרתיו אף עשיתיו
Isa 43:8 ח הוציא עם עור ועינים יש וחרשים ואזנים למו
Isa 43:9 ט כל הגוים נקבצו יחדו ויאספו לאמים--מי בהם יגיד זאת וראשנות ישמיענו יתנו עדיהם ויצדקו וישמעו ויאמרו אמת
Isa 43:10 י אתם עדי נאם יהוה ועבדי אשר בחרתי  למען תדעו ותאמינו לי ותבינו כי אני הוא--לפני לא נוצר אל ואחרי לא יהיה  {ס}
Isa 43:11 יא אנכי אנכי יהוה ואין מבלעדי מושיע
Isa 43:12 יב אנכי הגדתי והושעתי והשמעתי--ואין בכם זר ואתם עדי נאם יהוה ואני אל
Isa 43:13 יג גם מיום אני הוא ואין מידי מציל אפעל ומי ישיבנה  {ס}
Isa 43:14 יד כה אמר יהוה גאלכם קדוש ישראל  למענכם שלחתי בבלה והורדתי בריחים כלם וכשדים באניות רנתם
Isa 43:15 טו אני יהוה קדושכם בורא ישראל מלככם  {ס}
Isa 43:16 טז כה אמר יהוה הנותן בים דרך ובמים עזים נתיבה
Isa 43:17 יז המוציא רכב וסוס חיל ועזוז יחדו ישכבו בל יקומו דעכו כפשתה כבו
Isa 43:18 יח אל תזכרו ראשנות וקדמניות אל תתבננו
Isa 43:19 יט הנני עשה חדשה עתה תצמח הלוא תדעוה אף אשים במדבר דרך בישמון נהרות
Isa 43:20 כ תכבדני חית השדה תנים ובנות יענה  כי נתתי במדבר מים נהרות בישימן להשקות עמי בחירי
Isa 43:21 כא עם זו יצרתי לי תהלתי יספרו  {ס}
Isa 43:22 כב ולא אתי קראת יעקב  כי יגעת בי ישראל
Isa 43:23 כג לא הביאת לי שה עלתיך וזבחיך לא כבדתני לא העבדתיך במנחה ולא הוגעתיך בלבונה
Isa 43:24 כד לא קנית לי בכסף קנה וחלב זבחיך לא הרויתני אך העבדתני בחטאותיך הוגעתני בעונתיך
Isa 43:25 כה אנכי אנכי הוא מחה פשעיך למעני  וחטאתיך לא אזכר
Isa 43:26 כו הזכירני נשפטה יחד ספר אתה למען תצדק
Isa 43:27 כז אביך הראשון חטא ומליציך פשעו בי
Isa 43:28 כח ואחלל שרי קדש ואתנה לחרם יעקב וישראל לגדופים  {פ}