Allepo, Isaiah, Chapter 34

Isa 34:1 א קרבו גוים לשמע ולאמים הקשיבו תשמע הארץ ומלאה תבל וכל צאצאיה
Isa 34:2 ב כי קצף ליהוה על כל הגוים וחמה על כל צבאם החרימם נתנם לטבח
Isa 34:3 ג וחלליהם ישלכו ופגריהם יעלה באשם ונמסו הרים מדמם
Isa 34:4 ד ונמקו כל צבא השמים ונגלו כספר השמים וכל צבאם יבול--כנבל עלה מגפן וכנבלת מתאנה
Isa 34:5 ה כי רותה בשמים חרבי הנה על אדום תרד ועל עם חרמי למשפט
Isa 34:6 ו חרב ליהוה מלאה דם הדשנה מחלב מדם כרים ועתודים מחלב כליות אילים  כי זבח ליהוה בבצרה וטבח גדול בארץ אדום
Isa 34:7 ז וירדו ראמים עמם ופרים עם אבירים ורותה ארצם מדם ועפרם מחלב ידשן
Isa 34:8 ח כי יום נקם ליהוה--שנת שלומים לריב ציון
Isa 34:9 ט ונהפכו נחליה לזפת ועפרה לגפרית והיתה ארצה לזפת בערה
Isa 34:10 י לילה ויומם לא תכבה לעולם יעלה עשנה מדור לדור תחרב--לנצח נצחים אין עבר בה
Isa 34:11 יא וירשוה קאת וקפוד וינשוף וערב ישכנו בה ונטה עליה קו תהו ואבני בהו
Isa 34:12 יב חריה ואין שם מלוכה יקראו וכל שריה יהיו אפס
Isa 34:13 יג ועלתה ארמנתיה סירים קמוש וחוח במבצריה והיתה נוה תנים חציר לבנות יענה
Isa 34:14 יד ופגשו ציים את איים ושעיר על רעהו יקרא אך שם הרגיעה לילית ומצאה לה מנוח
Isa 34:15 טו שמה קננה קפוז ותמלט ובקעה ודגרה בצלה אך שם נקבצו דיות אשה רעותה
Isa 34:16 טז דרשו מעל ספר יהוה וקראו--אחת מהנה לא נעדרה אשה רעותה לא פקדו  כי פי הוא צוה ורוחו הוא קבצן
Isa 34:17 יז והוא הפיל להן גורל וידו חלקתה להם בקו עד עולם יירשוה--לדור ודור ישכנו בה  {ס}