Isa 29:1 א הוי אריאל אריאל קרית חנה דוד ספו שנה על שנה חגים ינקפו
Isa 29:2 ב והציקותי לאריאל והיתה תאניה ואניה והיתה לי כאריאל
Isa 29:3 ג וחניתי כדור עליך וצרתי עליך מצב והקימתי עליך מצרת
Isa 29:4 ד ושפלת מארץ תדברי ומעפר תשח אמרתך והיה כאוב מארץ קולך ומעפר אמרתך תצפצף
Isa 29:5 ה והיה כאבק דק המון זריך וכמץ עבר המון עריצים והיה לפתע פתאם
Isa 29:6 ו מעם יהוה צבאות תפקד ברעם וברעש וקול גדול סופה וסערה ולהב אש אוכלה
Isa 29:7 ז והיה כחלום חזון לילה המון כל הגוים הצבאים על אריאל וכל צביה ומצדתה והמציקים לה
Isa 29:8 ח והיה כאשר יחלם הרעב והנה אוכל והקיץ וריקה נפשו וכאשר יחלם הצמא והנה שתה והקיץ והנה עיף ונפשו שוקקה--כן יהיה המון כל הגוים הצבאים על הר ציון  {פ}
Isa 29:9 ט התמהמהו ותמהו השתעשעו ושעו שכרו ולא יין נעו ולא שכר
Isa 29:10 י כי נסך עליכם יהוה רוח תרדמה ויעצם את עיניכם  את הנביאים ואת ראשיכם החזים כסה
Isa 29:11 יא ותהי לכם חזות הכל כדברי הספר החתום אשר יתנו אתו אל יודע הספר (ספר) לאמר קרא נא זה ואמר לא אוכל כי חתום הוא
Isa 29:12 יב ונתן הספר על אשר לא ידע ספר לאמר--קרא נא זה ואמר לא ידעתי ספר  {ס}
Isa 29:13 יג ויאמר אדני יען כי נגש העם הזה בפיו ובשפתיו כבדוני ולבו רחק ממני--ותהי יראתם אתי מצות אנשים מלמדה
Isa 29:14 יד לכן הנני יוסף להפליא את העם הזה--הפלא ופלא ואבדה חכמת חכמיו ובינת נבניו תסתתר  {ס}
Isa 29:15 טו הוי המעמיקים מיהוה לסתר עצה והיה במחשך מעשיהם ויאמרו מי ראנו ומי ידענו
Isa 29:16 טז הפככם--אם כחמר היצר יחשב  כי יאמר מעשה לעשהו לא עשני ויצר אמר ליצרו לא הבין
Isa 29:17 יז הלוא עוד מעט מזער ושב לבנון לכרמל והכרמל ליער יחשב
Isa 29:18 יח ושמעו ביום ההוא החרשים דברי ספר ומאפל ומחשך עיני עורים תראינה
Isa 29:19 יט ויספו ענוים ביהוה שמחה ואביוני אדם בקדוש ישראל יגילו
Isa 29:20 כ כי אפס עריץ וכלה לץ ונכרתו כל שקדי און
Isa 29:21 כא מחטיאי אדם בדבר ולמוכיח בשער יקשון ויטו בתהו צדיק  {פ}
Isa 29:22 כב לכן כה אמר יהוה אל בית יעקב אשר פדה את אברהם  לא עתה יבוש יעקב ולא עתה פניו יחורו
Isa 29:23 כג כי בראתו ילדיו מעשה ידי בקרבו--יקדישו שמי והקדישו את קדוש יעקב ואת אלהי ישראל יעריצו
Isa 29:24 כד וידעו תעי רוח בינה ורוגנים ילמדו לקח  {ס}