Allepo, Isaiah, Chapter 28

Isa 28:1 א הוי עטרת גאות שכרי אפרים וציץ נבל צבי תפארתו--אשר על ראש גיא שמנים הלומי יין
Isa 28:2 ב הנה חזק ואמץ לאדני כזרם ברד שער קטב כזרם מים כבירים שטפים הניח לארץ--ביד
Isa 28:3 ג ברגלים תרמסנה עטרת גאות שכורי אפרים
Isa 28:4 ד והיתה ציצת נבל צבי תפארתו אשר על ראש גיא שמנים--כבכורה בטרם קיץ אשר יראה הראה אותה בעודה בכפו יבלענה  {ס}
Isa 28:5 ה ביום ההוא יהיה יהוה צבאות לעטרת צבי ולצפירת תפארה--לשאר עמו
Isa 28:6 ו ולרוח משפט--ליושב על המשפט ולגבורה משיבי מלחמה שערה  {ס}
Isa 28:7 ז וגם אלה ביין שגו ובשכר תעו  כהן ונביא שגו בשכר נבלעו מן היין תעו מן השכר שגו בראה פקו פליליה
Isa 28:8 ח כי כל שלחנות מלאו קיא צאה בלי מקום  {פ}
Isa 28:9 ט את מי יורה דעה ואת מי יבין שמועה--גמולי מחלב עתיקי משדים
Isa 28:10 י כי צו לצו צו לצו קו לקו קו לקו--זעיר שם זעיר שם
Isa 28:11 יא כי בלעגי שפה ובלשון אחרת ידבר אל העם הזה
Isa 28:12 יב אשר אמר אליהם זאת המנוחה הניחו לעיף וזאת המרגעה ולא אבוא שמוע
Isa 28:13 יג והיה להם דבר יהוה צו לצו צו לצו קו לקו קו לקו זעיר שם זעיר שם--למען ילכו וכשלו אחור ונשברו ונוקשו ונלכדו  {פ}
Isa 28:14 יד לכן שמעו דבר יהוה אנשי לצון--משלי העם הזה אשר בירושלם
Isa 28:15 טו כי אמרתם כרתנו ברית את מות ועם שאול עשינו חזה שיט (שוט) שוטף כי עבר (יעבר) לא יבואנו כי שמנו כזב מחסנו ובשקר נסתרנו  {פ}
Isa 28:16 טז לכן כה אמר אדני יהוה הנני יסד בציון אבן אבן בחן פנת יקרת מוסד מוסד--המאמין לא יחיש
Isa 28:17 יז ושמתי משפט לקו וצדקה למשקלת ויעה ברד מחסה כזב וסתר מים ישטפו  {ס}
Isa 28:18 יח וכפר בריתכם את מות וחזותכם את שאול לא תקום שוט שוטף כי יעבר והייתם לו למרמס
Isa 28:19 יט מדי עברו יקח אתכם כי בבקר בבקר יעבר ביום ובלילה והיה רק זועה הבין שמועה
Isa 28:20 כ כי קצר המצע מהשתרע והמסכה צרה כהתכנס
Isa 28:21 כא כי כהר פרצים יקום יהוה כעמק בגבעון ירגז--לעשות מעשהו זר מעשהו ולעבד עבדתו נכריה עבדתו
Isa 28:22 כב ועתה אל תתלוצצו פן יחזקו מוסריכם  כי כלה ונחרצה שמעתי מאת אדני יהוה צבאות--על כל הארץ  {פ}
Isa 28:23 כג האזינו ושמעו קולי הקשיבו ושמעו אמרתי
Isa 28:24 כד הכל היום יחרש החרש לזרע יפתח וישדד אדמתו
Isa 28:25 כה הלוא אם שוה פניה והפיץ קצח וכמן יזרק ושם חטה שורה ושערה נסמן וכסמת גבלתו
Isa 28:26 כו ויסרו למשפט אלהיו יורנו
Isa 28:27 כז כי לא בחרוץ יודש קצח ואופן עגלה על כמן יוסב  כי במטה יחבט קצח וכמן בשבט
Isa 28:28 כח לחם יודק כי לא לנצח אדוש ידושנו והמם גלגל עגלתו ופרשיו לא ידקנו
Isa 28:29 כט גם זאת מעם יהוה צבאות יצאה  הפלא עצה הגדיל תושיה  {פ}