Allepo, Isaiah, Chapter 24

Isa 24:1 א הנה יהוה בוקק הארץ ובולקה ועוה פניה והפיץ ישביה
Isa 24:2 ב והיה כעם ככהן כעבד כאדניו כשפחה כגברתה כקונה כמוכר כמלוה כלוה כנשה כאשר נשא בו
Isa 24:3 ג הבוק תבוק הארץ והבוז תבז  כי יהוה דבר את הדבר הזה
Isa 24:4 ד אבלה נבלה הארץ אמללה נבלה תבל אמללו מרום עם הארץ
Isa 24:5 ה והארץ חנפה תחת ישביה  כי עברו תורת חלפו חק הפרו ברית עולם
Isa 24:6 ו על כן אלה אכלה ארץ ויאשמו ישבי בה על כן חרו ישבי ארץ ונשאר אנוש מזער
Isa 24:7 ז אבל תירוש אמללה גפן נאנחו כל שמחי לב
Isa 24:8 ח שבת משוש תפים חדל שאון עליזים שבת משוש כנור
Isa 24:9 ט בשיר לא ישתו יין ימר שכר לשתיו
Isa 24:10 י נשברה קרית תהו סגר כל בית מבוא
Isa 24:11 יא צוחה על היין בחוצות ערבה כל שמחה גלה משוש הארץ
Isa 24:12 יב נשאר בעיר שמה ושאיה יכת שער
Isa 24:13 יג כי כה יהיה בקרב הארץ בתוך העמים כנקף זית כעוללת אם כלה בציר
Isa 24:14 יד המה ישאו קולם ירנו בגאון יהוה צהלו מים
Isa 24:15 טו על כן בארים כבדו יהוה באיי הים שם יהוה אלהי ישראל  {ס}
Isa 24:16 טז מכנף הארץ זמרת שמענו צבי לצדיק ואמר רזי לי רזי לי אוי לי בגדים בגדו ובגד בוגדים בגדו
Isa 24:17 יז פחד ופחת ופח עליך יושב הארץ
Isa 24:18 יח והיה הנס מקול הפחד יפל אל הפחת והעולה מתוך הפחת ילכד בפח  כי ארבות ממרום נפתחו וירעשו מוסדי ארץ
Isa 24:19 יט רעה התרעעה הארץ פור התפוררה ארץ מוט התמוטטה ארץ
Isa 24:20 כ נוע תנוע ארץ כשכור והתנודדה כמלונה וכבד עליה פשעה ונפלה ולא תסיף קום  {ס}
Isa 24:21 כא והיה ביום ההוא יפקד יהוה על צבא המרום במרום ועל מלכי האדמה על האדמה
Isa 24:22 כב ואספו אספה אסיר על בור וסגרו על מסגר ומרב ימים יפקדו
Isa 24:23 כג וחפרה הלבנה ובושה החמה  כי מלך יהוה צבאות בהר ציון ובירושלם ונגד זקניו כבוד  {פ}