Allepo, Isaiah, Chapter 21

Isa 21:1 א משא מדבר ים  כסופות בנגב לחלף ממדבר בא מארץ נוראה
Isa 21:2 ב חזות קשה הגד לי  הבוגד בוגד והשודד שודד עלי עילם צורי מדי כל אנחתה השבתי
Isa 21:3 ג על כן מלאו מתני חלחלה--צירים אחזוני כצירי יולדה נעויתי משמע נבהלתי מראות
Isa 21:4 ד תעה לבבי פלצות בעתתני את נשף חשקי שם לי לחרדה
Isa 21:5 ה ערך השלחן צפה הצפית אכול שתה קומו השרים משחו מגן  {ס}
Isa 21:6 ו כי כה אמר אלי אדני  לך העמד המצפה אשר יראה יגיד
Isa 21:7 ז וראה רכב צמד פרשים--רכב חמור רכב גמל והקשיב קשב רב קשב
Isa 21:8 ח ויקרא אריה--על מצפה אדני אנכי עמד תמיד יומם ועל משמרתי אנכי נצב כל הלילות
Isa 21:9 ט והנה זה בא רכב איש צמד פרשים ויען ויאמר נפלה נפלה בבל וכל פסילי אלהיה שבר לארץ
Isa 21:10 י מדשתי ובן גרני  אשר שמעתי מאת יהוה צבאות אלהי ישראל--הגדתי לכם  {פ}
Isa 21:11 יא משא דומה  אלי קרא משעיר שמר מה מלילה שמר מה מליל
Isa 21:12 יב אמר שמר אתה בקר וגם לילה אם תבעיון בעיו שבו אתיו  {פ}
Isa 21:13 יג משא בערב  ביער בערב תלינו ארחות דדנים
Isa 21:14 יד לקראת צמא התיו מים ישבי ארץ תימא בלחמו קדמו נדד
Isa 21:15 טו כי מפני חרבות נדדו מפני חרב נטושה ומפני קשת דרוכה ומפני כבד מלחמה  {ס}
Isa 21:16 טז כי כה אמר אדני אלי  בעוד שנה כשני שכיר וכלה כל כבוד קדר
Isa 21:17 יז ושאר מספר קשת גבורי בני קדר ימעטו  כי יהוה אלהי ישראל דבר  {ס}