Isa 14:1 א כי ירחם יהוה את יעקב ובחר עוד בישראל והניחם על אדמתם ונלוה הגר עליהם ונספחו על בית יעקב
Isa 14:2 ב ולקחום עמים והביאום אל מקומם והתנחלום בית ישראל על אדמת יהוה לעבדים ולשפחות והיו שבים לשביהם ורדו בנגשיהם  {ס}
Isa 14:3 ג והיה ביום הניח יהוה לך מעצבך ומרגזך--ומן העבדה הקשה אשר עבד בך
Isa 14:4 ד ונשאת המשל הזה על מלך בבל--ואמרת  איך שבת נגש שבתה מדהבה
Isa 14:5 ה שבר יהוה מטה רשעים--שבט משלים
Isa 14:6 ו מכה עמים בעברה מכת בלתי סרה רדה באף גוים מרדף בלי חשך
Isa 14:7 ז נחה שקטה כל הארץ פצחו רנה
Isa 14:8 ח גם ברושים שמחו לך ארזי לבנון מאז שכבת לא יעלה הכרת עלינו
Isa 14:9 ט שאול מתחת רגזה לך--לקראת בואך עורר לך רפאים כל עתודי ארץ--הקים מכסאותם כל מלכי גוים
Isa 14:10 י כלם יענו ויאמרו אליך  גם אתה חלית כמונו אלינו נמשלת
Isa 14:11 יא הורד שאול גאונך המית נבליך תחתיך יצע רמה ומכסיך תולעה
Isa 14:12 יב איך נפלת משמים הילל בן שחר נגדעת לארץ חולש על גוים
Isa 14:13 יג ואתה אמרת בלבבך השמים אעלה--ממעל לכוכבי אל ארים כסאי ואשב בהר מועד בירכתי צפון
Isa 14:14 יד אעלה על במתי עב אדמה לעליון
Isa 14:15 טו אך אל שאול תורד אל ירכתי בור
Isa 14:16 טז ראיך אליך ישגיחו אליך יתבוננו  הזה האיש מרגיז הארץ מרעיש ממלכות
Isa 14:17 יז שם תבל כמדבר ועריו הרס אסיריו לא פתח ביתה
Isa 14:18 יח כל מלכי גוים כלם--שכבו בכבוד איש בביתו
Isa 14:19 יט ואתה השלכת מקברך כנצר נתעב--לבש הרגים מטעני חרב יורדי אל אבני בור כפגר מובס
Isa 14:20 כ לא תחד אתם בקבורה כי ארצך שחת עמך הרגת לא יקרא לעולם זרע מרעים
Isa 14:21 כא הכינו לבניו מטבח בעון אבותם בל יקמו וירשו ארץ ומלאו פני תבל ערים
Isa 14:22 כב וקמתי עליהם נאם יהוה צבאות והכרתי לבבל שם ושאר ונין ונכד--נאם יהוה
Isa 14:23 כג ושמתיה למורש קפד ואגמי מים וטאטאתיה במטאטא השמד נאם יהוה צבאות  {ס}
Isa 14:24 כד נשבע יהוה צבאות לאמר  אם לא כאשר דמיתי כן היתה וכאשר יעצתי היא תקום
Isa 14:25 כה לשבר אשור בארצי ועל הרי אבוסנו וסר מעליהם עלו וסבלו מעל שכמו יסור
Isa 14:26 כו זאת העצה היעוצה על כל הארץ וזאת היד הנטויה על כל הגוים
Isa 14:27 כז כי יהוה צבאות יעץ ומי יפר וידו הנטויה ומי ישיבנה  {פ}
Isa 14:28 כח בשנת מות המלך אחז היה המשא הזה
Isa 14:29 כט אל תשמחי פלשת כלך כי נשבר שבט מכך  כי משרש נחש יצא צפע ופריו שרף מעופף
Isa 14:30 ל ורעו בכורי דלים ואביונים לבטח ירבצו והמתי ברעב שרשך ושאריתך יהרג
Isa 14:31 לא הילילי שער זעקי עיר נמוג פלשת כלך  כי מצפון עשן בא ואין בודד במועדיו
Isa 14:32 לב ומה יענה מלאכי גוי  כי יהוה יסד ציון ובה יחסו עניי עמו  {פ}