Isa 10:1 א הוי החקקים חקקי און ומכתבים עמל כתבו
Isa 10:2 ב להטות מדין דלים ולגזל משפט עניי עמי--להיות אלמנות שללם ואת יתומים יבזו
Isa 10:3 ג ומה תעשו ליום פקדה ולשואה ממרחק תבוא  על מי תנוסו לעזרה ואנה תעזבו כבודכם
Isa 10:4 ד בלתי כרע תחת אסיר ותחת הרוגים יפלו בכל זאת לא שב אפו ועוד ידו נטויה  {פ}
Isa 10:5 ה הוי אשור שבט אפי ומטה הוא בידם זעמי
Isa 10:6 ו בגוי חנף אשלחנו ועל עם עברתי אצונו--לשלל שלל ולבז בז ולשימו (ולשומו) מרמס כחמר חוצות
Isa 10:7 ז והוא לא כן ידמה ולבבו לא כן יחשב  כי להשמיד בלבבו ולהכרית גוים לא מעט
Isa 10:8 ח כי יאמר  הלא שרי יחדו מלכים
Isa 10:9 ט הלא ככרכמיש כלנו  אם לא כארפד חמת אם לא כדמשק שמרון
Isa 10:10 י כאשר מצאה ידי לממלכת האליל ופסיליהם מירושלם ומשמרון
Isa 10:11 יא הלא כאשר עשיתי לשמרון--ולאליליה  כן אעשה לירושלם ולעצביה  {פ}
Isa 10:12 יב והיה כי יבצע אדני את כל מעשהו בהר ציון ובירושלם--אפקד על פרי גדל לבב מלך אשור ועל תפארת רום עיניו
Isa 10:13 יג כי אמר בכח ידי עשיתי ובחכמתי כי נבנותי ואסיר גבולת עמים ועתידתיהם (ועתודתיהם) שושתי ואוריד כאביר יושבים
Isa 10:14 יד ותמצא כקן ידי לחיל העמים וכאסף ביצים עזבות כל הארץ אני אספתי ולא היה נדד כנף ופצה פה ומצפצף
Isa 10:15 טו היתפאר הגרזן על החצב בו  אם יתגדל המשור על מניפו כהניף שבט ואת מרימיו כהרים מטה לא עץ  {פ}
Isa 10:16 טז לכן ישלח האדון יהוה צבאות במשמניו--רזון ותחת כבדו יקד יקד כיקוד אש
Isa 10:17 יז והיה אור ישראל לאש וקדושו ללהבה ובערה ואכלה שיתו ושמירו--ביום אחד
Isa 10:18 יח וכבוד יערו וכרמלו מנפש ועד בשר יכלה והיה כמסס נסס
Isa 10:19 יט ושאר עץ יערו מספר יהיו ונער יכתבם  {ס}
Isa 10:20 כ והיה ביום ההוא לא יוסיף עוד שאר ישראל ופליטת בית יעקב להשען על מכהו ונשען על יהוה קדוש ישראל--באמת
Isa 10:21 כא שאר ישוב שאר יעקב--אל אל גבור
Isa 10:22 כב כי אם יהיה עמך ישראל כחול הים--שאר ישוב בו כליון חרוץ שוטף צדקה
Isa 10:23 כג כי כלה ונחרצה--אדני יהוה צבאות עשה בקרב כל הארץ  {פ}
Isa 10:24 כד לכן כה אמר אדני יהוה צבאות אל תירא עמי ישב ציון מאשור בשבט יככה ומטהו ישא עליך בדרך מצרים
Isa 10:25 כה כי עוד מעט מזער וכלה זעם ואפי על תבליתם
Isa 10:26 כו ועורר עליו יהוה צבאות שוט כמכת מדין בצור עורב ומטהו על הים ונשאו בדרך מצרים
Isa 10:27 כז והיה ביום ההוא יסור סבלו מעל שכמך ועלו מעל צוארך וחבל על מפני שמן
Isa 10:28 כח בא על עית עבר במגרון למכמש יפקיד כליו
Isa 10:29 כט עברו מעברה גבע מלון לנו חרדה הרמה--גבעת שאול נסה
Isa 10:30 ל צהלי קולך בת גלים הקשיבי לישה עניה ענתות
Isa 10:31 לא נדדה מדמנה ישבי הגבים העיזו
Isa 10:32 לב עוד היום בנב לעמד ינפף ידו הר בית (בת) ציון גבעת ירושלם  {פ}
Isa 10:33 לג הנה האדון יהוה צבאות מסעף פארה במערצה ורמי הקומה גדועים והגבהים ישפלו
Isa 10:34 לד ונקף סבכי היער בברזל והלבנון באדיר יפול  {ס}