Isa 9:1 א העם ההלכים בחשך ראו אור גדול  ישבי בארץ צלמות אור נגה עליהם
Isa 9:2 ב הרבית הגוי לא (לו) הגדלת השמחה שמחו לפניך כשמחת בקציר כאשר יגילו בחלקם שלל
Isa 9:3 ג כי את על סבלו ואת מטה שכמו שבט הנגש בו--החתת כיום מדין
Isa 9:4 ד כי כל סאון סאן ברעש ושמלה מגוללה בדמים והיתה לשרפה מאכלת אש
Isa 9:5 ה כי ילד ילד לנו בן נתן לנו ותהי המשרה על שכמו ויקרא שמו פלא יועץ אל גבור אבי עד שר שלום
Isa 9:6 ו לם רבה (למרבה) המשרה ולשלום אין קץ על כסא דוד ועל ממלכתו להכין אתה ולסעדה במשפט ובצדקה מעתה ועד עולם קנאת יהוה צבאות תעשה זאת  {פ}
Isa 9:7 ז דבר שלח אדני ביעקב ונפל בישראל
Isa 9:8 ח וידעו העם כלו אפרים ויושב שמרון בגאוה ובגדל לבב לאמר
Isa 9:9 ט לבנים נפלו וגזית נבנה שקמים גדעו וארזים נחליף
Isa 9:10 י וישגב יהוה את צרי רצין עליו ואת איביו יסכסך
Isa 9:11 יא ארם מקדם ופלשתים מאחור ויאכלו את ישראל בכל פה בכל זאת לא שב אפו ועוד ידו נטויה
Isa 9:12 יב והעם לא שב עד המכהו ואת יהוה צבאות לא דרשו  {ס}
Isa 9:13 יג ויכרת יהוה מישראל ראש וזנב כפה ואגמון--יום אחד
Isa 9:14 יד זקן ונשוא פנים הוא הראש ונביא מורה שקר הוא הזנב
Isa 9:15 טו ויהיו מאשרי העם הזה מתעים ומאשריו מבלעים
Isa 9:16 טז על כן על בחוריו לא ישמח אדני ואת יתמיו ואת אלמנותיו לא ירחם--כי כלו חנף ומרע וכל פה דבר נבלה בכל זאת לא שב אפו ועוד ידו נטויה
Isa 9:17 יז כי בערה כאש רשעה שמיר ושית תאכל ותצת בסבכי היער ויתאבכו גאות עשן
Isa 9:18 יח בעברת יהוה צבאות נעתם ארץ ויהי העם כמאכלת אש איש אל אחיו לא יחמלו
Isa 9:19 יט ויגזר על ימין ורעב ויאכל על שמאול ולא שבעו  איש בשר זרעו יאכלו
Isa 9:20 כ מנשה את אפרים ואפרים את מנשה--יחדו המה על יהודה בכל זאת לא שב אפו ועוד ידו נטויה  {ס}
Isa 9:21