Allepo, Isaiah, Chapter 07

Isa 7:1 א ויהי בימי אחז בן יותם בן עזיהו מלך יהודה עלה רצין מלך ארם ופקח בן רמליהו מלך ישראל ירושלם למלחמה עליה ולא יכל להלחם עליה
Isa 7:2 ב ויגד לבית דוד לאמר נחה ארם על אפרים וינע לבבו ולבב עמו כנוע עצי יער מפני רוח  {ס}
Isa 7:3 ג ויאמר יהוה אל ישעיהו צא נא לקראת אחז אתה ושאר ישוב בנך  אל קצה תעלת הברכה העליונה--אל מסלת שדה כובס
Isa 7:4 ד ואמרת אליו השמר והשקט אל תירא ולבבך אל ירך משני זנבות האודים העשנים האלה--בחרי אף רצין וארם ובן רמליהו
Isa 7:5 ה יען כי יעץ עליך ארם--רעה  אפרים ובן רמליהו לאמר
Isa 7:6 ו נעלה ביהודה ונקיצנה ונבקענה אלינו ונמליך מלך בתוכה את בן טבאל  {פ}
Isa 7:7 ז כה אמר אדני יהוה  לא תקום ולא תהיה
Isa 7:8 ח כי ראש ארם דמשק וראש דמשק רצין ובעוד ששים וחמש שנה יחת אפרים מעם
Isa 7:9 ט וראש אפרים שמרון וראש שמרון בן רמליהו אם לא תאמינו כי לא תאמנו  {פ}
Isa 7:10 י ויוסף יהוה דבר אל אחז לאמר
Isa 7:11 יא שאל לך אות מעם יהוה אלהיך העמק שאלה או הגבה למעלה
Isa 7:12 יב ויאמר אחז  לא אשאל ולא אנסה את יהוה
Isa 7:13 יג ויאמר שמעו נא בית דוד  המעט מכם הלאות אנשים כי תלאו גם את אלהי
Isa 7:14 יד לכן יתן אדני הוא לכם--אות  הנה העלמה הרה וילדת בן וקראת שמו עמנו אל
Isa 7:15 טו חמאה ודבש יאכל--לדעתו מאוס ברע ובחור בטוב
Isa 7:16 טז כי בטרם ידע הנער מאס ברע--ובחר בטוב  תעזב האדמה אשר אתה קץ מפני שני מלכיה
Isa 7:17 יז יביא יהוה עליך ועל עמך ועל בית אביך ימים אשר לא באו למיום סור אפרים מעל יהודה  את מלך אשור  {פ}
Isa 7:18 יח והיה ביום ההוא ישרק יהוה לזבוב אשר בקצה יארי מצרים ולדבורה--אשר בארץ אשור
Isa 7:19 יט ובאו ונחו כלם בנחלי הבתות ובנקיקי הסלעים ובכל הנעצוצים ובכל הנהללים
Isa 7:20 כ ביום ההוא יגלח אדני בתער השכירה בעברי נהר במלך אשור את הראש ושער הרגלים וגם את הזקן תספה  {פ}
Isa 7:21 כא והיה ביום ההוא יחיה איש עגלת בקר ושתי צאן
Isa 7:22 כב והיה מרב עשות חלב--יאכל חמאה  כי חמאה ודבש יאכל כל הנותר בקרב הארץ  {ס}
Isa 7:23 כג והיה ביום ההוא--יהיה כל מקום אשר יהיה שם אלף גפן באלף כסף  לשמיר ולשית יהיה
Isa 7:24 כד בחצים ובקשת יבוא שמה  כי שמיר ושית תהיה כל הארץ
Isa 7:25 כה וכל ההרים אשר במעדר יעדרון--לא תבוא שמה יראת שמיר ושית והיה למשלח שור ולמרמס שה  {פ}