Isa 5:1 א אשירה נא לידידי שירת דודי לכרמו  כרם היה לידידי בקרן בן שמן
Isa 5:2 ב ויעזקהו ויסקלהו ויטעהו שרק ויבן מגדל בתוכו וגם יקב חצב בו ויקו לעשות ענבים ויעש באשים
Isa 5:3 ג ועתה יושב ירושלם ואיש יהודה--שפטו נא ביני ובין כרמי
Isa 5:4 ד מה לעשות עוד לכרמי ולא עשיתי בו  מדוע קויתי לעשות ענבים ויעש באשים
Isa 5:5 ה ועתה אודיעה נא אתכם את אשר אני עשה לכרמי  הסר משוכתו והיה לבער פרץ גדרו והיה למרמס
Isa 5:6 ו ואשיתהו בתה לא יזמר ולא יעדר ועלה שמיר ושית ועל העבים אצוה מהמטיר עליו מטר
Isa 5:7 ז כי כרם יהוה צבאות בית ישראל ואיש יהודה נטע שעשועיו ויקו למשפט והנה משפח לצדקה והנה צעקה  {פ}
Isa 5:8 ח הוי מגיעי בית בבית--שדה בשדה יקריבו  עד אפס מקום והושבתם לבדכם בקרב הארץ
Isa 5:9 ט באזני יהוה צבאות  אם לא בתים רבים לשמה יהיו--גדלים וטובים מאין יושב
Isa 5:10 י כי עשרת צמדי כרם יעשו בת אחת וזרע חמר יעשה איפה  {ס}
Isa 5:11 יא הוי משכימי בבקר שכר ירדפו מאחרי בנשף יין ידליקם
Isa 5:12 יב והיה כנור ונבל תף וחליל ויין--משתיהם ואת פעל יהוה לא יביטו ומעשה ידיו לא ראו
Isa 5:13 יג לכן גלה עמי מבלי דעת וכבודו מתי רעב והמונו צחה צמא
Isa 5:14 יד לכן הרחיבה שאול נפשה ופערה פיה לבלי חק וירד הדרה והמונה ושאונה ועלז בה
Isa 5:15 טו וישח אדם וישפל איש ועיני גבהים תשפלנה
Isa 5:16 טז ויגבה יהוה צבאות במשפט והאל הקדוש נקדש בצדקה
Isa 5:17 יז ורעו כבשים כדברם וחרבות מחים גרים יאכלו  {ס}
Isa 5:18 יח הוי משכי העון בחבלי השוא וכעבות העגלה חטאה
Isa 5:19 יט האמרים ימהר יחישה מעשהו--למען נראה ותקרב ותבואה עצת קדוש ישראל--ונדעה  {פ}
Isa 5:20 כ הוי האמרים לרע טוב ולטוב רע  שמים חשך לאור ואור לחשך שמים מר למתוק ומתוק למר  {ס}
Isa 5:21 כא הוי חכמים בעיניהם ונגד פניהם נבנים  {ס}
Isa 5:22 כב הוי גבורים לשתות יין ואנשי חיל למסך שכר
Isa 5:23 כג מצדיקי רשע עקב שחד וצדקת צדיקים יסירו ממנו  {פ}
Isa 5:24 כד לכן כאכל קש לשון אש וחשש להבה ירפה שרשם כמק יהיה ופרחם כאבק יעלה  כי מאסו את תורת יהוה צבאות ואת אמרת קדוש ישראל נאצו
Isa 5:25 כה על כן חרה אף יהוה בעמו ויט ידו עליו ויכהו וירגזו ההרים ותהי נבלתם כסוחה בקרב חוצות בכל זאת לא שב אפו ועוד ידו נטויה
Isa 5:26 כו ונשא נס לגוים מרחוק ושרק לו מקצה הארץ והנה מהרה קל יבוא
Isa 5:27 כז אין עיף ואין כושל בו לא ינום ולא יישן ולא נפתח אזור חלציו ולא נתק שרוך נעליו
Isa 5:28 כח אשר חציו שנונים וכל קשתתיו דרכות פרסות סוסיו כצר נחשבו וגלגליו כסופה
Isa 5:29 כט שאגה לו כלביא ושאג (ישאג) ככפירים וינהם ויאחז טרף ויפליט ואין מציל
Isa 5:30 ל וינהם עליו ביום ההוא כנהמת ים ונבט לארץ והנה חשך צר ואור חשך בעריפיה  {פ}