Isa 3:1 א כי הנה האדון יהוה צבאות מסיר מירושלם ומיהודה משען ומשענה  כל משען לחם וכל משען מים
Isa 3:2 ב גבור ואיש מלחמה שופט ונביא וקסם וזקן
Isa 3:3 ג שר חמשים ונשוא פנים ויועץ וחכם חרשים ונבון לחש
Isa 3:4 ד ונתתי נערים שריהם ותעלולים ימשלו בם
Isa 3:5 ה ונגש העם איש באיש ואיש ברעהו ירהבו הנער בזקן והנקלה בנכבד
Isa 3:6 ו כי יתפש איש באחיו בית אביו שמלה לכה קצין תהיה לנו והמכשלה הזאת תחת ידך
Isa 3:7 ז ישא ביום ההוא לאמר לא אהיה חבש ובביתי אין לחם ואין שמלה לא תשימני קצין עם
Isa 3:8 ח כי כשלה ירושלם ויהודה נפל  כי לשונם ומעלליהם אל יהוה למרות עני כבודו
Isa 3:9 ט הכרת פניהם ענתה בם וחטאתם כסדם הגידו לא כחדו אוי לנפשם כי גמלו להם רעה
Isa 3:10 י אמרו צדיק כי טוב  כי פרי מעלליהם יאכלו
Isa 3:11 יא אוי לרשע רע  כי גמול ידיו יעשה לו
Isa 3:12 יב עמי נגשיו מעולל ונשים משלו בו עמי מאשריך מתעים ודרך ארחתיך בלעו  {פ}
Isa 3:13 יג נצב לריב יהוה ועמד לדין עמים
Isa 3:14 יד יהוה במשפט יבוא עם זקני עמו ושריו ואתם בערתם הכרם גזלת העני בבתיכם
Isa 3:15 טו מלכם (מה לכם) תדכאו עמי ופני עניים תטחנו  נאם אדני יהוה צבאות  {ס}
Isa 3:16 טז ויאמר יהוה יען כי גבהו בנות ציון ותלכנה נטוות (נטויות) גרון ומשקרות עינים הלוך וטפף תלכנה וברגליהם תעכסנה
Isa 3:17 יז ושפח אדני קדקד בנות ציון ויהוה פתהן יערה  {ס}
Isa 3:18 יח ביום ההוא יסיר אדני את תפארת העכסים והשביסים--והשהרנים
Isa 3:19 יט הנטפות והשירות והרעלות
Isa 3:20 כ הפארים והצעדות והקשרים ובתי הנפש והלחשים
Isa 3:21 כא הטבעות ונזמי האף
Isa 3:22 כב המחלצות והמעטפות והמטפחות והחריטים
Isa 3:23 כג והגלינים והסדינים והצניפות והרדידים
Isa 3:24 כד והיה תחת בשם מק יהיה ותחת חגורה נקפה ותחת מעשה מקשה קרחה ותחת פתיגיל מחגרת שק  כי תחת יפי
Isa 3:25 כה מתיך בחרב יפלו וגבורתך במלחמה
Isa 3:26 כו ואנו ואבלו פתחיה ונקתה לארץ תשב