Isa 2:1 א הדבר אשר חזה ישעיהו בן אמוץ על יהודה וירושלם
Isa 2:2 ב והיה באחרית הימים נכון יהיה הר בית יהוה בראש ההרים ונשא מגבעות ונהרו אליו כל הגוים
Isa 2:3 ג והלכו עמים רבים ואמרו לכו ונעלה אל הר יהוה אל בית אלהי יעקב וירנו מדרכיו ונלכה בארחתיו  כי מציון תצא תורה ודבר יהוה מירושלם
Isa 2:4 ד ושפט בין הגוים והוכיח לעמים רבים וכתתו חרבותם לאתים וחניתותיהם למזמרות--לא ישא גוי אל גוי חרב ולא ילמדו עוד מלחמה  {פ}
Isa 2:5 ה בית יעקב--לכו ונלכה באור יהוה
Isa 2:6 ו כי נטשתה עמך בית יעקב--כי מלאו מקדם ועננים כפלשתים ובילדי נכרים ישפיקו
Isa 2:7 ז ותמלא ארצו כסף וזהב ואין קצה לאצרתיו ותמלא ארצו סוסים ואין קצה למרכבתיו
Isa 2:8 ח ותמלא ארצו אלילים  למעשה ידיו ישתחוו לאשר עשו אצבעתיו
Isa 2:9 ט וישח אדם וישפל איש ואל תשא להם
Isa 2:10 י בוא בצור והטמן בעפר מפני פחד יהוה ומהדר גאנו
Isa 2:11 יא עיני גבהות אדם שפל ושח רום אנשים ונשגב יהוה לבדו ביום ההוא  {פ}
Isa 2:12 יב כי יום ליהוה צבאות על כל גאה--ורם ועל כל נשא ושפל
Isa 2:13 יג ועל כל ארזי הלבנון הרמים והנשאים ועל כל אלוני הבשן
Isa 2:14 יד ועל כל ההרים הרמים ועל כל הגבעות הנשאות
Isa 2:15 טו ועל כל מגדל גבה ועל כל חומה בצורה
Isa 2:16 טז ועל כל אניות תרשיש ועל כל שכיות החמדה
Isa 2:17 יז ושח גבהות האדם ושפל רום אנשים ונשגב יהוה לבדו ביום ההוא
Isa 2:18 יח והאלילים כליל יחלף
Isa 2:19 יט ובאו במערות צרים ובמחלות עפר--מפני פחד יהוה ומהדר גאונו בקומו לערץ הארץ
Isa 2:20 כ ביום ההוא ישליך האדם את אלילי כספו ואת אלילי זהבו--אשר עשו לו להשתחות לחפר פרות ולעטלפים
Isa 2:21 כא לבוא בנקרות הצרים ובסעפי הסלעים--מפני פחד יהוה ומהדר גאונו בקומו לערץ הארץ
Isa 2:22 כב חדלו לכם מן האדם אשר נשמה באפו  כי במה נחשב הוא  {פ}