Pro 30:1 א  דברי אגור בן-יקה--המשא    נאם הגבר לאיתיאל לאיתיאל ואכל
Pro 30:2 ב  כי בער אנכי מאיש    ולא-בינת אדם לי
Pro 30:3 ג  ולא-למדתי חכמה    ודעת קדשים אדע
Pro 30:4 ד  מי עלה-שמים    וירד מי אסף-רוח בחפניו    מי צרר-מים בשמלה-- מי    הקים כל-אפסי-ארץ מה-שמו ומה-שם-בנו    כי תדע
Pro 30:5 ה  כל-אמרת אלוה צרופה    מגן הוא לחסים בו
Pro 30:6 ו  אל-תוסף על-דבריו    פן-יוכיח בך ונכזבת
Pro 30:7 ז  שתים שאלתי מאתך    אל-תמנע ממני בטרם אמות
Pro 30:8 ח  שוא ודבר-כזב הרחק ממני--    ראש ועשר אל-תתן-לי הטריפני    לחם חקי
Pro 30:9 ט  פן אשבע וכחשתי--    ואמרתי מי יהוה ופן-אורש וגנבתי    ותפשתי שם אלהי
Pro 30:10 י  אל-תלשן עבד אל-אדנו    פן-יקללך ואשמת
Pro 30:11 יא  דור אביו יקלל    ואת-אמו לא יברך
Pro 30:12 יב  דור טהור בעיניו    ומצאתו לא רחץ
Pro 30:13 יג  דור מה-רמו עיניו    ועפעפיו ינשאו
Pro 30:14 יד  דור חרבות שניו--    ומאכלות מתלעתיו לאכל עניים מארץ    ואביונים מאדם
Pro 30:15 טו  לעלוקה שתי בנות--    הב הב שלוש הנה לא תשבענה    ארבע לא-אמרו הון
Pro 30:16 טז  שאול ועצר-רחם    ארץ לא-שבעה מים ואש לא-אמרה הון
Pro 30:17 יז  עין תלעג לאב--    ותבז ליקהת-אם יקרוה ערבי-נחל    ויאכלוה בני-נשר
Pro 30:18 יח  שלשה המה נפלאו ממני    וארבע (וארבעה) לא ידעתים
Pro 30:19 יט  דרך הנשר בשמים--    דרך נחש עלי-צור דרך-אניה בלב-ים--    ודרך גבר בעלמה
Pro 30:20 כ  כן דרך אשה--    מנאפת אכלה ומחתה פיה    ואמרה לא-פעלתי און
Pro 30:21 כא  תחת שלוש רגזה ארץ    ותחת ארבע לא-תוכל שאת
Pro 30:22 כב  תחת-עבד כי ימלוך    ונבל כי ישבע-לחם
Pro 30:23 כג  תחת שנואה כי תבעל    ושפחה כי תירש גברתה
Pro 30:24 כד  ארבעה הם קטני-ארץ    והמה חכמים מחכמים
Pro 30:25 כה  הנמלים עם לא-עז    ויכינו בקיץ לחמם
Pro 30:26 כו  שפנים עם לא-עצום    וישימו בסלע ביתם
Pro 30:27 כז  מלך אין לארבה    ויצא חצץ כלו
Pro 30:28 כח  שממית בידים תתפש    והיא בהיכלי מלך
Pro 30:29 כט  שלשה המה מיטיבי צעד    וארבעה מיטבי לכת
Pro 30:30 ל  ליש גבור בבהמה    ולא-ישוב מפני-כל
Pro 30:31 לא  זרזיר מתנים או-תיש    ומלך אלקום עמו
Pro 30:32 לב  אם-נבלת בהתנשא    ואם-זמות יד לפה
Pro 30:33 לג  כי מיץ חלב יוציא חמאה--    ומיץ-אף יוציא דם ומיץ אפים    יוציא ריב