Pro 29:1 א  איש תוכחות מקשה-ערף--    פתע ישבר ואין מרפא
Pro 29:2 ב  ברבות צדיקים ישמח העם    ובמשל רשע יאנח עם
Pro 29:3 ג  איש-אהב חכמה ישמח אביו    ורעה זונות יאבד-הון
Pro 29:4 ד  מלך--במשפט יעמיד ארץ    ואיש תרומות יהרסנה
Pro 29:5 ה  גבר מחליק על-רעהו    רשת פורש על-פעמיו
Pro 29:6 ו  בפשע איש רע מוקש    וצדיק ירון ושמח
Pro 29:7 ז  ידע צדיק דין דלים    רשע לא-יבין דעת
Pro 29:8 ח  אנשי לצון יפיחו קריה    וחכמים ישיבו אף
Pro 29:9 ט  איש-חכם--נשפט את-איש אויל    ורגז ושחק ואין נחת
Pro 29:10 י  אנשי דמים ישנאו-תם    וישרים יבקשו נפשו
Pro 29:11 יא  כל-רוחו יוציא כסיל    וחכם באחור ישבחנה
Pro 29:12 יב  משל מקשיב על-דבר-שקר--    כל-משרתיו רשעים
Pro 29:13 יג  רש ואיש תככים נפגשו--    מאיר עיני שניהם יהוה
Pro 29:14 יד  מלך שופט באמת דלים--    כסאו לעד יכון
Pro 29:15 טו  שבט ותוכחת יתן חכמה    ונער משלח מביש אמו
Pro 29:16 טז  ברבות רשעים ירבה-פשע    וצדיקים במפלתם יראו
Pro 29:17 יז  יסר בנך ויניחך    ויתן מעדנים לנפשך
Pro 29:18 יח  באין חזון יפרע עם    ושמר תורה אשרהו
Pro 29:19 יט  בדברים לא-יוסר עבד    כי-יבין ואין מענה
Pro 29:20 כ  חזית--איש אץ בדבריו    תקוה לכסיל ממנו
Pro 29:21 כא  מפנק מנער עבדו    ואחריתו יהיה מנון
Pro 29:22 כב  איש-אף יגרה מדון    ובעל חמה רב-פשע
Pro 29:23 כג  גאות אדם תשפילנו    ושפל-רוח יתמך כבוד
Pro 29:24 כד  חולק עם-גנב שונא נפשו    אלה ישמע ולא יגיד
Pro 29:25 כה  חרדת אדם יתן מוקש    ובוטח ביהוה ישגב
Pro 29:26 כו  רבים מבקשים פני-מושל    ומיהוה משפט-איש
Pro 29:27 כז  תועבת צדיקים איש עול    ותועבת רשע ישר-דרך