Pro 27:1 א  אל-תתהלל ביום מחר    כי לא-תדע מה-ילד יום
Pro 27:2 ב  יהללך זר ולא-פיך    נכרי ואל-שפתיך
Pro 27:3 ג  כבד-אבן ונטל החול    וכעס אויל כבד משניהם
Pro 27:4 ד  אכזריות חמה ושטף אף    ומי יעמד לפני קנאה
Pro 27:5 ה  טובה תוכחת מגלה--    מאהבה מסתרת
Pro 27:6 ו  נאמנים פצעי אוהב    ונעתרות נשיקות שונא
Pro 27:7 ז  נפש שבעה תבוס נפת    ונפש רעבה כל-מר מתוק
Pro 27:8 ח  כצפור נודדת מן-קנה--    כן-איש נודד ממקומו
Pro 27:9 ט  שמן וקטרת ישמח-לב    ומתק רעהו מעצת-נפש
Pro 27:10 י  רעך ורעה (ורע) אביך אל-תעזב--    ובית אחיך אל-תבוא ביום אידך טוב שכן קרוב    מאח רחוק
Pro 27:11 יא  חכם בני ושמח לבי    ואשיבה חרפי דבר
Pro 27:12 יב  ערום ראה רעה נסתר    פתאים עברו נענשו
Pro 27:13 יג  קח-בגדו כי-ערב זר    ובעד נכריה חבלהו
Pro 27:14 יד  מברך רעהו בקול גדול--בבקר השכים    קללה תחשב לו
Pro 27:15 טו  דלף טורד ביום סגריר    ואשת מדונים (מדינים) נשתוה
Pro 27:16 טז  צפניה צפן-רוח    ושמן ימינו יקרא
Pro 27:17 יז  ברזל בברזל יחד    ואיש יחד פני-רעהו
Pro 27:18 יח  נצר תאנה יאכל פריה    ושמר אדניו יכבד
Pro 27:19 יט  כמים הפנים לפנים--    כן לב-האדם לאדם
Pro 27:20 כ  שאול ואבדה לא תשבענה    ועיני האדם לא תשבענה
Pro 27:21 כא  מצרף לכסף וכור לזהב    ואיש לפי מהללו
Pro 27:22 כב  אם תכתוש-את-האויל במכתש בתוך הריפות--    בעלי לא-תסור מעליו אולתו
Pro 27:23 כג  ידע תדע פני צאנך    שית לבך לעדרים
Pro 27:24 כד  כי לא לעולם חסן    ואם-נזר לדור דור (ודור)
Pro 27:25 כה  גלה חציר ונראה-דשא    ונאספו עשבות הרים
Pro 27:26 כו  כבשים ללבושך    ומחיר שדה עתודים
Pro 27:27 כז  ודי חלב עזים--ללחמך ללחם ביתך    וחיים לנערותיך