Allepo, Proverbs, Chapter 25

Pro 25:1 א  גם-אלה משלי שלמה--    אשר העתיקו אנשי חזקיה מלך-יהודה
Pro 25:2 ב  כבד אלהים הסתר דבר    וכבד מלכים חקר דבר
Pro 25:3 ג  שמים לרום וארץ לעמק    ולב מלכים אין חקר
Pro 25:4 ד  הגו סיגים מכסף    ויצא לצרף כלי
Pro 25:5 ה  הגו רשע לפני-מלך    ויכון בצדק כסאו
Pro 25:6 ו  אל-תתהדר לפני-מלך    ובמקום גדלים אל-תעמד
Pro 25:7 ז  כי טוב אמר-לך עלה-הנה    מהשפילך לפני נדיב--אשר ראו עיניך
Pro 25:8 ח  אל-תצא לרב מהר    פן מה-תעשה באחריתה--בהכלים אתך רעך
Pro 25:9 ט  ריבך ריב את-רעך    וסוד אחר אל-תגל
Pro 25:10 י  פן-יחסדך שמע    ודבתך לא תשוב
Pro 25:11 יא  תפוחי זהב במשכיות כסף--    דבר דבר על-אפניו
Pro 25:12 יב  נזם זהב וחלי-כתם--    מוכיח חכם על-אזן שמעת
Pro 25:13 יג  כצנת שלג ביום קציר--ציר נאמן לשלחיו    ונפש אדניו ישיב
Pro 25:14 יד  נשיאים ורוח וגשם אין--    איש מתהלל במתת-שקר
Pro 25:15 טו  בארך אפים יפתה קצין    ולשון רכה תשבר-גרם
Pro 25:16 טז  דבש מצאת אכל דיך    פן-תשבענו והקאתו
Pro 25:17 יז  הקר רגלך מבית רעך    פן-ישבעך ושנאך
Pro 25:18 יח  מפיץ וחרב וחץ שנון--    איש ענה ברעהו עד שקר
Pro 25:19 יט  שן רעה ורגל מועדת--    מבטח בוגד ביום צרה
Pro 25:20 כ  מעדה-בגד ביום קרה--חמץ על-נתר    ושר בשרים על לב-רע
Pro 25:21 כא  אם-רעב שנאך האכלהו לחם    ואם-צמא השקהו מים
Pro 25:22 כב  כי גחלים--אתה חתה על-ראשו    ויהוה ישלם-לך
Pro 25:23 כג  רוח צפון תחולל גשם    ופנים נזעמים לשון סתר
Pro 25:24 כד  טוב שבת על-פנת-גג--    מאשת מדונים (מדינים) ובית חבר
Pro 25:25 כה  מים קרים על-נפש עיפה    ושמועה טובה מארץ מרחק
Pro 25:26 כו  מעין נרפש ומקור משחת--    צדיק מט לפני-רשע
Pro 25:27 כז  אכל דבש הרבות לא-טוב    וחקר כבדם כבוד
Pro 25:28 כח  עיר פרוצה אין חומה--    איש אשר אין מעצר לרוחו