Allepo, Proverbs, Chapter 22

Pro 22:1 א  נבחר שם מעשר רב    מכסף ומזהב חן טוב
Pro 22:2 ב  עשיר ורש נפגשו    עשה כלם יהוה
Pro 22:3 ג  ערום ראה רעה ויסתר (ונסתר)    ופתיים עברו ונענשו
Pro 22:4 ד  עקב ענוה יראת יהוה    עשר וכבוד וחיים
Pro 22:5 ה  צנים פחים בדרך עקש    שומר נפשו ירחק מהם
Pro 22:6 ו  חנך לנער על-פי דרכו--    גם כי-יזקין לא-יסור ממנה
Pro 22:7 ז  עשיר ברשים ימשול    ועבד לוה לאיש מלוה
Pro 22:8 ח  זורע עולה יקצור- (יקצר-) און    ושבט עברתו יכלה
Pro 22:9 ט  טוב-עין הוא יברך    כי-נתן מלחמו לדל
Pro 22:10 י  גרש לץ ויצא מדון    וישבת דין וקלון
Pro 22:11 יא  אהב טהור- (טהר-) לב--    חן שפתיו רעהו מלך
Pro 22:12 יב  עיני יהוה נצרו דעת    ויסלף דברי בגד
Pro 22:13 יג  אמר עצל ארי בחוץ    בתוך רחבות ארצח
Pro 22:14 יד  שוחה עמקה פי זרות    זעום יהוה יפול- (יפל-) שם
Pro 22:15 טו  אולת קשורה בלב-נער    שבט מוסר ירחיקנה ממנו
Pro 22:16 טז  עשק דל להרבות לו--    נתן לעשיר אך-למחסור
Pro 22:17 יז  הט אזנך--ושמע דברי חכמים    ולבך תשית לדעתי
Pro 22:18 יח  כי-נעים כי-תשמרם בבטנך    יכנו יחדו על-שפתיך
Pro 22:19 יט  להיות ביהוה מבטחך--    הודעתיך היום אף-אתה
Pro 22:20 כ  הלא כתבתי לך שלשום (שלשים)--    במעצות ודעת
Pro 22:21 כא  להודיעך--קשט אמרי אמת    להשיב אמרים אמת לשלחיך
Pro 22:22 כב  אל-תגזל-דל כי דל-הוא    ואל-תדכא עני בשער
Pro 22:23 כג  כי-יהוה יריב ריבם    וקבע את-קבעיהם נפש
Pro 22:24 כד  אל-תתרע את-בעל אף    ואת-איש חמות לא תבוא
Pro 22:25 כה  פן-תאלף ארחתו    ולקחת מוקש לנפשך
Pro 22:26 כו  אל-תהי בתקעי-כף    בערבים משאות
Pro 22:27 כז  אם-אין-לך לשלם--    למה יקח משכבך מתחתיך
Pro 22:28 כח  אל-תסג גבול עולם--    אשר עשו אבותיך
Pro 22:29 כט  חזית איש מהיר במלאכתו--    לפני-מלכים יתיצב בל-יתיצב    לפני חשכים