Pro 20:1 א  לץ היין המה שכר    וכל-שגה בו לא יחכם
Pro 20:2 ב  נהם ככפיר אימת מלך    מתעברו חוטא נפשו
Pro 20:3 ג  כבוד לאיש שבת מריב    וכל-אויל יתגלע
Pro 20:4 ד  מחרף עצל לא-יחרש    ישאל (ושאל) בקציר ואין
Pro 20:5 ה  מים עמקים עצה בלב-איש    ואיש תבונה ידלנה
Pro 20:6 ו  רב-אדם--יקרא איש חסדו    ואיש אמונים מי ימצא
Pro 20:7 ז  מתהלך בתמו צדיק    אשרי בניו אחריו
Pro 20:8 ח  מלך יושב על-כסא-דין--    מזרה בעיניו כל-רע
Pro 20:9 ט  מי-יאמר זכיתי לבי    טהרתי מחטאתי
Pro 20:10 י  אבן ואבן איפה ואיפה--    תועבת יהוה גם-שניהם
Pro 20:11 יא  גם במעלליו יתנכר-נער--    אם-זך ואם-ישר פעלו
Pro 20:12 יב  אזן שמעת ועין ראה--    יהוה עשה גם-שניהם
Pro 20:13 יג  אל-תאהב שנה פן-תורש    פקח עיניך שבע-לחם
Pro 20:14 יד  רע רע יאמר הקונה    ואזל לו אז יתהלל
Pro 20:15 טו  יש זהב ורב-פנינים    וכלי יקר שפתי-דעת
Pro 20:16 טז  לקח-בגדו כי-ערב זר    ובעד נכרים (נכריה) חבלהו
Pro 20:17 יז  ערב לאיש לחם שקר    ואחר ימלא-פיהו חצץ
Pro 20:18 יח  מחשבות בעצה תכון    ובתחבלות עשה מלחמה
Pro 20:19 יט  גולה-סוד הולך רכיל    ולפתה שפתיו לא תתערב
Pro 20:20 כ  מקלל אביו ואמו--    ידעך נרו באישון (באשון) חשך
Pro 20:21 כא  נחלה מבחלת (מבהלת) בראשונה    ואחריתה לא תברך
Pro 20:22 כב  אל-תאמר אשלמה-רע    קוה ליהוה וישע לך
Pro 20:23 כג  תועבת יהוה אבן ואבן    ומאזני מרמה לא-טוב
Pro 20:24 כד  מיהוה מצעדי-גבר    ואדם מה-יבין דרכו
Pro 20:25 כה  מוקש אדם ילע קדש    ואחר נדרים לבקר
Pro 20:26 כו  מזרה רשעים מלך חכם    וישב עליהם אופן
Pro 20:27 כז  נר יהוה נשמת אדם    חפש כל-חדרי-בטן
Pro 20:28 כח  חסד ואמת יצרו-מלך    וסעד בחסד כסאו
Pro 20:29 כט  תפארת בחורים כחם    והדר זקנים שיבה
Pro 20:30 ל  חברות פצע תמריק (תמרוק) ברע    ומכות חדרי-בטן