Allepo, Proverbs, Chapter 18

Pro 18:1 א  לתאוה יבקש נפרד    בכל-תושיה יתגלע
Pro 18:2 ב  לא-יחפץ כסיל בתבונה    כי אם-בהתגלות לבו
Pro 18:3 ג  בבוא-רשע בא גם-בוז    ועם-קלון חרפה
Pro 18:4 ד  מים עמקים דברי פי-איש    נחל נבע מקור חכמה
Pro 18:5 ה  שאת פני-רשע לא-טוב--    להטות צדיק במשפט
Pro 18:6 ו  שפתי כסיל יבאו בריב    ופיו למהלמות יקרא
Pro 18:7 ז  פי-כסיל מחתה-לו    ושפתיו מוקש נפשו
Pro 18:8 ח  דברי נרגן כמתלהמים    והם ירדו חדרי-בטן
Pro 18:9 ט  גם מתרפה במלאכתו--    אח הוא לבעל משחית
Pro 18:10 י  מגדל-עז שם יהוה    בו-ירוץ צדיק ונשגב
Pro 18:11 יא  הון עשיר קרית עזו    וכחומה נשגבה במשכתו
Pro 18:12 יב  לפני-שבר יגבה לב-איש    ולפני כבוד ענוה
Pro 18:13 יג  משיב דבר בטרם ישמע--    אולת היא-לו וכלמה
Pro 18:14 יד  רוח-איש יכלכל מחלהו    ורוח נכאה מי ישאנה
Pro 18:15 טו  לב נבון יקנה-דעת    ואזן חכמים תבקש-דעת
Pro 18:16 טז  מתן אדם ירחיב לו    ולפני גדלים ינחנו
Pro 18:17 יז  צדיק הראשון בריבו    יבא- (ובא-) רעהו וחקרו
Pro 18:18 יח  מדינים ישבית הגורל    ובין עצומים יפריד
Pro 18:19 יט  אח--נפשע מקרית-עז    ומדונים (ומדינים) כבריח ארמון
Pro 18:20 כ  מפרי פי-איש תשבע בטנו    תבואת שפתיו ישבע
Pro 18:21 כא  מות וחיים ביד-לשון    ואהביה יאכל פריה
Pro 18:22 כב  מצא אשה מצא טוב    ויפק רצון מיהוה
Pro 18:23 כג  תחנונים ידבר-רש    ועשיר יענה עזות
Pro 18:24 כד  איש רעים להתרעע    ויש אהב דבק מאח