Pro 17:1 א  טוב פת חרבה ושלוה-בה--    מבית מלא זבחי-ריב
Pro 17:2 ב  עבד-משכיל--ימשל בבן מביש    ובתוך אחים יחלק נחלה
Pro 17:3 ג  מצרף לכסף וכור לזהב    ובחן לבות יהוה
Pro 17:4 ד  מרע מקשיב על-שפת-און    שקר מזין על-לשון הות
Pro 17:5 ה  לעג לרש חרף עשהו    שמח לאיד לא ינקה
Pro 17:6 ו  עטרת זקנים בני בנים    ותפארת בנים אבותם
Pro 17:7 ז  לא-נאוה לנבל שפת-יתר    אף כי-לנדיב שפת-שקר
Pro 17:8 ח  אבן-חן השחד בעיני בעליו    אל-כל-אשר יפנה ישכיל
Pro 17:9 ט  מכסה-פשע מבקש אהבה    ושנה בדבר מפריד אלוף
Pro 17:10 י  תחת גערה במבין--    מהכות כסיל מאה
Pro 17:11 יא  אך-מרי יבקש-רע    ומלאך אכזרי ישלח-בו
Pro 17:12 יב  פגוש דב שכול באיש    ואל-כסיל באולתו
Pro 17:13 יג  משיב רעה תחת טובה--    לא-תמיש (תמוש) רעה מביתו
Pro 17:14 יד  פוטר מים ראשית מדון    ולפני התגלע הריב נטוש
Pro 17:15 טו  מצדיק רשע ומרשיע צדיק--    תועבת יהוה גם-שניהם
Pro 17:16 טז  למה-זה מחיר ביד-כסיל--    לקנות חכמה ולב-אין
Pro 17:17 יז  בכל-עת אהב הרע    ואח לצרה יולד
Pro 17:18 יח  אדם חסר-לב תוקע כף    ערב ערבה לפני רעהו
Pro 17:19 יט  אהב פשע אהב מצה    מגביה פתחו מבקש-שבר
Pro 17:20 כ  עקש-לב לא ימצא-טוב    ונהפך בלשונו יפול ברעה
Pro 17:21 כא  ילד כסיל לתוגה לו    ולא-ישמח אבי נבל
Pro 17:22 כב  לב שמח ייטיב גהה    ורוח נכאה תיבש-גרם
Pro 17:23 כג  שחד מחק רשע יקח--    להטות ארחות משפט
Pro 17:24 כד  את-פני מבין חכמה    ועיני כסיל בקצה-ארץ
Pro 17:25 כה  כעס לאביו בן כסיל    וממר ליולדתו
Pro 17:26 כו  גם ענוש לצדיק לא-טוב--    להכות נדיבים על-ישר
Pro 17:27 כז  חושך אמריו יודע דעת    וקר- (יקר-) רוח איש תבונה
Pro 17:28 כח  גם אויל מחריש חכם יחשב    אטם שפתיו נבון