Allepo, Proverbs, Chapter 16

Pro 16:1 א  לאדם מערכי-לב    ומיהוה מענה לשון
Pro 16:2 ב  כל-דרכי-איש זך בעיניו    ותכן רוחות יהוה
Pro 16:3 ג  גל אל-יהוה מעשיך    ויכנו מחשבתיך
Pro 16:4 ד  כל פעל יהוה למענהו    וגם-רשע ליום רעה
Pro 16:5 ה  תועבת יהוה כל-גבה-לב    יד ליד לא ינקה
Pro 16:6 ו  בחסד ואמת יכפר עון    וביראת יהוה סור מרע
Pro 16:7 ז  ברצות יהוה דרכי-איש    גם-אויביו ישלם אתו
Pro 16:8 ח  טוב-מעט בצדקה--    מרב תבואות בלא משפט
Pro 16:9 ט  לב אדם יחשב דרכו    ויהוה יכין צעדו
Pro 16:10 י  קסם על-שפתי-מלך    במשפט לא ימעל-פיו
Pro 16:11 יא  פלס ומאזני משפט--ליהוה    מעשהו כל-אבני-כיס
Pro 16:12 יב  תועבת מלכים עשות רשע    כי בצדקה יכון כסא
Pro 16:13 יג  רצון מלכים שפתי-צדק    ודבר ישרים יאהב
Pro 16:14 יד  חמת-מלך מלאכי-מות    ואיש חכם יכפרנה
Pro 16:15 טו  באור-פני-מלך חיים    ורצונו כעב מלקוש
Pro 16:16 טז  קנה-חכמה--מה-טוב מחרוץ    וקנות בינה נבחר מכסף
Pro 16:17 יז  מסלת ישרים סור מרע    שמר נפשו נצר דרכו
Pro 16:18 יח  לפני-שבר גאון    ולפני כשלון גבה רוח
Pro 16:19 יט  טוב שפל-רוח את-עניים (ענוים)    מחלק שלל את-גאים
Pro 16:20 כ  משכיל על-דבר ימצא-טוב    ובוטח ביהוה אשריו
Pro 16:21 כא  לחכם-לב יקרא נבון    ומתק שפתים יסיף לקח
Pro 16:22 כב  מקור חיים שכל בעליו    ומוסר אולים אולת
Pro 16:23 כג  לב חכם ישכיל פיהו    ועל-שפתיו יסיף לקח
Pro 16:24 כד  צוף-דבש אמרי-נעם    מתוק לנפש ומרפא לעצם
Pro 16:25 כה  יש דרך ישר לפני-איש    ואחריתה דרכי-מות
Pro 16:26 כו  נפש עמל עמלה לו    כי-אכף עליו פיהו
Pro 16:27 כז  איש בליעל כרה רעה    ועל-שפתיו (שפתו) כאש צרבת
Pro 16:28 כח  איש תהפכות ישלח מדון    ונרגן מפריד אלוף
Pro 16:29 כט  איש חמס יפתה רעהו    והוליכו בדרך לא-טוב
Pro 16:30 ל  עצה עיניו לחשב תהפכות    קרץ שפתיו כלה רעה
Pro 16:31 לא  עטרת תפארת שיבה    בדרך צדקה תמצא
Pro 16:32 לב  טוב ארך אפים מגבור    ומשל ברוחו מלכד עיר
Pro 16:33 לג  בחיק יוטל את-הגורל    ומיהוה כל-משפטו