Pro 15:1 א  מענה-רך ישיב חמה    ודבר-עצב יעלה-אף
Pro 15:2 ב  לשון חכמים תיטיב דעת    ופי כסילים יביע אולת
Pro 15:3 ג  בכל-מקום עיני יהוה    צפות רעים וטובים
Pro 15:4 ד  מרפא לשון עץ חיים    וסלף בה שבר ברוח
Pro 15:5 ה  אויל--ינאץ מוסר אביו    ושמר תוכחת יערים
Pro 15:6 ו  בית צדיק חסן רב    ובתבואת רשע נעכרת
Pro 15:7 ז  שפתי חכמים יזרו דעת    ולב כסילים לא-כן
Pro 15:8 ח  זבח רשעים תועבת יהוה    ותפלת ישרים רצונו
Pro 15:9 ט  תועבת יהוה דרך רשע    ומרדף צדקה יאהב
Pro 15:10 י  מוסר רע לעזב ארח    שונא תוכחת ימות
Pro 15:11 יא  שאול ואבדון נגד יהוה    אף כי-לבות בני-אדם
Pro 15:12 יב  לא יאהב-לץ הוכח לו    אל-חכמים לא ילך
Pro 15:13 יג  לב שמח ייטב פנים    ובעצבת-לב רוח נכאה
Pro 15:14 יד  לב נבון יבקש-דעת    ופני (ופי) כסילים ירעה אולת
Pro 15:15 טו  כל-ימי עני רעים    וטוב-לב משתה תמיד
Pro 15:16 טז  טוב-מעט ביראת יהוה--    מאוצר רב ומהומה בו
Pro 15:17 יז  טוב ארחת ירק ואהבה-שם--    משור אבוס ושנאה-בו
Pro 15:18 יח  איש חמה יגרה מדון    וארך אפים ישקיט ריב
Pro 15:19 יט  דרך עצל כמשכת חדק    וארח ישרים סללה
Pro 15:20 כ  בן חכם ישמח-אב    וכסיל אדם בוזה אמו
Pro 15:21 כא  אולת שמחה לחסר-לב    ואיש תבונה יישר-לכת
Pro 15:22 כב  הפר מחשבות באין סוד    וברב יועצים תקום
Pro 15:23 כג  שמחה לאיש במענה-פיו    ודבר בעתו מה-טוב
Pro 15:24 כד  ארח חיים למעלה למשכיל--    למען סור משאול מטה
Pro 15:25 כה  בית גאים יסח יהוה    ויצב גבול אלמנה
Pro 15:26 כו  תועבת יהוה מחשבות רע    וטהרים אמרי-נעם
Pro 15:27 כז  עכר ביתו בוצע בצע    ושונא מתנת יחיה
Pro 15:28 כח  לב צדיק יהגה לענות    ופי רשעים יביע רעות
Pro 15:29 כט  רחוק יהוה מרשעים    ותפלת צדיקים ישמע
Pro 15:30 ל  מאור-עינים ישמח-לב    שמועה טובה תדשן-עצם
Pro 15:31 לא  אזן--שמעת תוכחת חיים    בקרב חכמים תלין
Pro 15:32 לב  פורע מוסר מואס נפשו    ושומע תוכחת קונה לב
Pro 15:33 לג  יראת יהוה מוסר חכמה    ולפני כבוד ענוה