Pro 13:1 א  בן חכם מוסר אב    ולץ לא-שמע גערה
Pro 13:2 ב  מפרי פי-איש יאכל טוב    ונפש בגדים חמס
Pro 13:3 ג  נצר פיו שמר נפשו    פשק שפתיו מחתה-לו
Pro 13:4 ד  מתאוה ואין נפשו עצל    ונפש חרצים תדשן
Pro 13:5 ה  דבר-שקר ישנא צדיק    ורשע יבאיש ויחפיר
Pro 13:6 ו  צדקה תצר תם-דרך    ורשעה תסלף חטאת
Pro 13:7 ז  יש מתעשר ואין כל    מתרושש והון רב
Pro 13:8 ח  כפר נפש-איש עשרו    ורש לא-שמע גערה
Pro 13:9 ט  אור-צדיקים ישמח    ונר רשעים ידעך
Pro 13:10 י  רק-בזדון יתן מצה    ואת-נועצים חכמה
Pro 13:11 יא  הון מהבל ימעט    וקבץ על-יד ירבה
Pro 13:12 יב  תוחלת ממשכה מחלה-לב    ועץ חיים תאוה באה
Pro 13:13 יג  בז לדבר יחבל לו    וירא מצוה הוא ישלם
Pro 13:14 יד  תורת חכם מקור חיים--    לסור ממקשי מות
Pro 13:15 טו  שכל-טוב יתן-חן    ודרך בגדים איתן
Pro 13:16 טז  כל-ערום יעשה בדעת    וכסיל יפרש אולת
Pro 13:17 יז  מלאך רשע יפל ברע    וציר אמונים מרפא
Pro 13:18 יח  ריש וקלון פורע מוסר    ושמר תוכחת יכבד
Pro 13:19 יט  תאוה נהיה תערב לנפש    ותועבת כסילים סור מרע
Pro 13:20 כ  הלוך (הולך) את-חכמים וחכם (יחכם)    ורעה כסילים ירוע
Pro 13:21 כא  חטאים תרדף רעה    ואת-צדיקים ישלם-טוב
Pro 13:22 כב  טוב--ינחיל בני-בנים    וצפון לצדיק חיל חוטא
Pro 13:23 כג  רב-אכל ניר ראשים    ויש נספה בלא משפט
Pro 13:24 כד  חושך שבטו שונא בנו    ואהבו שחרו מוסר
Pro 13:25 כה  צדיק--אכל לשבע נפשו    ובטן רשעים תחסר