Allepo, Proverbs, Chapter 12

Pro 12:1 א  אהב מוסר אהב דעת    ושונא תוכחת בער
Pro 12:2 ב  טוב--יפיק רצון מיהוה    ואיש מזמות ירשיע
Pro 12:3 ג  לא-יכון אדם ברשע    ושרש צדיקים בל-ימוט
Pro 12:4 ד  אשת-חיל עטרת בעלה    וכרקב בעצמותיו מבישה
Pro 12:5 ה  מחשבות צדיקים משפט    תחבלות רשעים מרמה
Pro 12:6 ו  דברי רשעים ארב-דם    ופי ישרים יצילם
Pro 12:7 ז  הפוך רשעים ואינם    ובית צדיקים יעמד
Pro 12:8 ח  לפי-שכלו יהלל-איש    ונעוה-לב יהיה לבוז
Pro 12:9 ט  טוב נקלה ועבד לו--    ממתכבד וחסר-לחם
Pro 12:10 י  יודע צדיק נפש בהמתו    ורחמי רשעים אכזרי
Pro 12:11 יא  עבד אדמתו ישבע-לחם    ומרדף ריקים חסר-לב
Pro 12:12 יב  חמד רשע מצוד רעים    ושרש צדיקים יתן
Pro 12:13 יג  בפשע שפתים מוקש רע    ויצא מצרה צדיק
Pro 12:14 יד  מפרי פי-איש ישבע-טוב    וגמול ידי-אדם ישוב (ישיב) לו
Pro 12:15 טו  דרך אויל ישר בעיניו    ושמע לעצה חכם
Pro 12:16 טז  אויל--ביום יודע כעסו    וכסה קלון ערום
Pro 12:17 יז  יפיח אמונה יגיד צדק    ועד שקרים מרמה
Pro 12:18 יח  יש בוטה כמדקרות חרב    ולשון חכמים מרפא
Pro 12:19 יט  שפת-אמת תכון לעד    ועד-ארגיעה לשון שקר
Pro 12:20 כ  מרמה בלב-חרשי רע    וליעצי שלום שמחה
Pro 12:21 כא  לא-יאנה לצדיק כל-און    ורשעים מלאו רע
Pro 12:22 כב  תועבת יהוה שפתי-שקר    ועשי אמונה רצונו
Pro 12:23 כג  אדם ערום כסה דעת    ולב כסילים יקרא אולת
Pro 12:24 כד  יד-חרוצים תמשול    ורמיה תהיה למס
Pro 12:25 כה  דאגה בלב-איש ישחנה    ודבר טוב ישמחנה
Pro 12:26 כו  יתר מרעהו צדיק    ודרך רשעים תתעם
Pro 12:27 כז  לא-יחרך רמיה צידו    והון-אדם יקר חרוץ
Pro 12:28 כח  בארח-צדקה חיים    ודרך נתיבה אל-מות