Allepo, Proverbs, Chapter 10

Pro 10:1 א                  משלי שלמה בן חכם ישמח-אב    ובן כסיל תוגת אמו
Pro 10:2 ב  לא-יועילו אוצרות רשע    וצדקה תציל ממות
Pro 10:3 ג  לא-ירעיב יהוה נפש צדיק    והות רשעים יהדף
Pro 10:4 ד  ראש--עשה כף-רמיה    ויד חרוצים תעשיר
Pro 10:5 ה  אגר בקיץ בן משכיל    נרדם בקציר בן מביש
Pro 10:6 ו  ברכות לראש צדיק    ופי רשעים יכסה חמס
Pro 10:7 ז  זכר צדיק לברכה    ושם רשעים ירקב
Pro 10:8 ח  חכם-לב יקח מצות    ואויל שפתים ילבט
Pro 10:9 ט  הולך בתם ילך בטח    ומעקש דרכיו יודע
Pro 10:10 י  קרץ עין יתן עצבת    ואויל שפתים ילבט
Pro 10:11 יא  מקור חיים פי צדיק    ופי רשעים יכסה חמס
Pro 10:12 יב  שנאה תערר מדנים    ועל כל-פשעים תכסה אהבה
Pro 10:13 יג  בשפתי נבון תמצא חכמה    ושבט לגו חסר-לב
Pro 10:14 יד  חכמים יצפנו-דעת    ופי-אויל מחתה קרבה
Pro 10:15 טו  הון עשיר קרית עזו    מחתת דלים רישם
Pro 10:16 טז  פעלת צדיק לחיים    תבואת רשע לחטאת
Pro 10:17 יז  ארח לחיים שומר מוסר    ועזב תוכחת מתעה
Pro 10:18 יח  מכסה שנאה שפתי-שקר    ומוצא דבה הוא כסיל
Pro 10:19 יט  ברב דברים לא יחדל-פשע    וחושך שפתיו משכיל
Pro 10:20 כ  כסף נבחר לשון צדיק    לב רשעים כמעט
Pro 10:21 כא  שפתי צדיק ירעו רבים    ואוילים בחסר-לב ימותו
Pro 10:22 כב  ברכת יהוה היא תעשיר    ולא-יוסף עצב עמה
Pro 10:23 כג  כשחוק לכסיל עשות זמה    וחכמה לאיש תבונה
Pro 10:24 כד  מגורת רשע היא תבואנו    ותאות צדיקים יתן
Pro 10:25 כה  כעבור סופה ואין רשע    וצדיק יסוד עולם
Pro 10:26 כו  כחמץ לשנים--וכעשן לעינים    כן העצל לשלחיו
Pro 10:27 כז  יראת יהוה תוסיף ימים    ושנות רשעים תקצרנה
Pro 10:28 כח  תוחלת צדיקים שמחה    ותקות רשעים תאבד
Pro 10:29 כט  מעוז לתם דרך יהוה    ומחתה לפעלי און
Pro 10:30 ל  צדיק לעולם בל-ימוט    ורשעים לא ישכנו-ארץ
Pro 10:31 לא  פי-צדיק ינוב חכמה    ולשון תהפכות תכרת
Pro 10:32 לב  שפתי צדיק ידעון רצון    ופי רשעים תהפכות