Pro 8:1 א  הלא-חכמה תקרא    ותבונה תתן קולה
Pro 8:2 ב  בראש-מרמים עלי-דרך    בית נתיבות נצבה
Pro 8:3 ג  ליד-שערים לפי-קרת    מבוא פתחים תרנה
Pro 8:4 ד  אליכם אישים אקרא    וקולי אל-בני אדם
Pro 8:5 ה  הבינו פתאים ערמה    וכסילים הבינו לב
Pro 8:6 ו  שמעו כי-נגידים אדבר    ומפתח שפתי מישרים
Pro 8:7 ז  כי-אמת יהגה חכי    ותועבת שפתי רשע
Pro 8:8 ח  בצדק כל-אמרי-פי    אין בהם נפתל ועקש
Pro 8:9 ט  כלם נכחים למבין    וישרים למצאי דעת
Pro 8:10 י  קחו-מוסרי ואל-כסף    ודעת מחרוץ נבחר
Pro 8:11 יא  כי-טובה חכמה מפנינים    וכל-חפצים לא ישוו-בה
Pro 8:12 יב  אני-חכמה שכנתי ערמה    ודעת מזמות אמצא
Pro 8:13 יג  יראת יהוה    שנאת-רע גאה וגאון ודרך רע ופי תהפכות    שנאתי
Pro 8:14 יד  לי-עצה ותושיה    אני בינה לי גבורה
Pro 8:15 טו  בי מלכים ימלכו    ורזנים יחקקו צדק
Pro 8:16 טז  בי שרים ישרו    ונדיבים כל-שפטי צדק
Pro 8:17 יז  אני אהביה (אהבי) אהב    ומשחרי ימצאנני
Pro 8:18 יח  עשר-וכבוד אתי    הון עתק וצדקה
Pro 8:19 יט  טוב פריי מחרוץ ומפז    ותבואתי מכסף נבחר
Pro 8:20 כ  בארח-צדקה אהלך    בתוך נתיבות משפט
Pro 8:21 כא  להנחיל אהבי יש    ואצרתיהם אמלא
Pro 8:22 כב  יהוה--קנני ראשית דרכו    קדם מפעליו מאז
Pro 8:23 כג  מעולם נסכתי מראש--    מקדמי-ארץ
Pro 8:24 כד  באין-תהמות חוללתי    באין מעינות נכבדי-מים
Pro 8:25 כה  בטרם הרים הטבעו    לפני גבעות חוללתי
Pro 8:26 כו  עד-לא עשה ארץ וחוצות    וראש עפרות תבל
Pro 8:27 כז  בהכינו שמים שם אני    בחקו חוג על-פני תהום
Pro 8:28 כח  באמצו שחקים ממעל    בעזוז עינות תהום
Pro 8:29 כט  בשומו לים חקו ומים לא יעברו-פיו    בחוקו מוסדי ארץ
Pro 8:30 ל  ואהיה אצלו אמון    ואהיה שעשועים יום יום משחקת לפניו בכל-עת
Pro 8:31 לא  משחקת בתבל ארצו    ושעשעי את-בני אדם
Pro 8:32 לב  ועתה בנים שמעו-לי    ואשרי דרכי ישמרו
Pro 8:33 לג  שמעו מוסר וחכמו    ואל-תפרעו
Pro 8:34 לד  אשרי אדם שמע-לי    לשקד על-דלתתי יום יום--לשמר מזוזת פתחי
Pro 8:35 לה  כי מצאי מצאי (מצא) חיים    ויפק רצון מיהוה
Pro 8:36 לו  וחטאי חמס נפשו    כל-משנאי אהבו מות