Allepo, Proverbs, Chapter 07

Pro 7:1 א  בני שמר אמרי    ומצותי תצפן אתך
Pro 7:2 ב  שמר מצותי וחיה    ותורתי כאישון עיניך
Pro 7:3 ג  קשרם על-אצבעתיך    כתבם על-לוח לבך
Pro 7:4 ד  אמר לחכמה אחתי את    ומדע לבינה תקרא
Pro 7:5 ה  לשמרך מאשה זרה    מנכריה אמריה החליקה
Pro 7:6 ו  כי בחלון ביתי--    בעד אשנבי נשקפתי
Pro 7:7 ז  וארא בפתאים אבינה בבנים--    נער חסר-לב
Pro 7:8 ח  עבר בשוק אצל פנה    ודרך ביתה יצעד
Pro 7:9 ט  בנשף-בערב יום    באישון לילה ואפלה
Pro 7:10 י  והנה אשה לקראתו    שית זונה ונצרת לב
Pro 7:11 יא  המיה היא וסררת    בביתה לא-ישכנו רגליה
Pro 7:12 יב  פעם בחוץ--פעם ברחבות    ואצל כל-פנה תארב
Pro 7:13 יג  והחזיקה בו ונשקה לו    העזה פניה ותאמר לו
Pro 7:14 יד  זבחי שלמים עלי    היום שלמתי נדרי
Pro 7:15 טו  על-כן יצאתי לקראתך    לשחר פניך ואמצאך
Pro 7:16 טז  מרבדים רבדתי ערשי    חטבות אטון מצרים
Pro 7:17 יז  נפתי משכבי--    מר אהלים וקנמון
Pro 7:18 יח  לכה נרוה דדים עד-הבקר    נתעלסה באהבים
Pro 7:19 יט  כי אין האיש בביתו    הלך בדרך מרחוק
Pro 7:20 כ  צרור-הכסף לקח בידו    ליום הכסא יבא ביתו
Pro 7:21 כא  הטתו ברב לקחה    בחלק שפתיה תדיחנו
Pro 7:22 כב  הולך אחריה פתאם    כשור אל-טבח יבא וכעכס אל-מוסר אויל
Pro 7:23 כג  עד יפלח חץ כבדו--    כמהר צפור אל-פח ולא-ידע    כי-בנפשו הוא
Pro 7:24 כד  ועתה בנים שמעו-לי    והקשיבו לאמרי-פי
Pro 7:25 כה  אל-ישט אל-דרכיה לבך    אל-תתע בנתיבותיה
Pro 7:26 כו  כי-רבים חללים הפילה    ועצמים כל-הרגיה
Pro 7:27 כז  דרכי שאול ביתה    ירדות אל-חדרי-מות