Pro 6:1 א  בני אם-ערבת לרעך    תקעת לזר כפיך
Pro 6:2 ב  נוקשת באמרי-פיך    נלכדת באמרי-פיך
Pro 6:3 ג  עשה זאת אפוא בני והנצל--    כי באת בכף-רעך לך התרפס    ורהב רעיך
Pro 6:4 ד  אל-תתן שנה לעיניך    ותנומה לעפעפיך
Pro 6:5 ה  הנצל כצבי מיד    וכצפור מיד יקוש
Pro 6:6 ו  לך-אל-נמלה עצל    ראה דרכיה וחכם
Pro 6:7 ז  אשר אין-לה קצין--    שטר ומשל
Pro 6:8 ח  תכין בקיץ לחמה    אגרה בקציר מאכלה
Pro 6:9 ט  עד-מתי עצל תשכב    מתי תקום משנתך
Pro 6:10 י  מעט שנות מעט תנומות    מעט חבק ידים לשכב
Pro 6:11 יא  ובא-כמהלך ראשך    ומחסרך כאיש מגן
Pro 6:12 יב  אדם בליעל איש און    הולך עקשות פה
Pro 6:13 יג  קרץ בעינו מלל ברגלו    מרה באצבעתיו
Pro 6:14 יד  תהפכות בלבו--חרש רע בכל-עת    מדנים (מדינים) ישלח
Pro 6:15 טו  על-כן--פתאם יבוא אידו    פתע ישבר ואין מרפא
Pro 6:16 טז  שש-הנה שנא יהוה    ושבע תועבות (תועבת) נפשו
Pro 6:17 יז  עינים רמות לשון שקר    וידים שפכות דם-נקי
Pro 6:18 יח  לב--חרש מחשבות און    רגלים ממהרות לרוץ לרעה
Pro 6:19 יט  יפיח כזבים עד שקר    ומשלח מדנים בין אחים
Pro 6:20 כ  נצר בני מצות אביך    ואל-תטש תורת אמך
Pro 6:21 כא  קשרם על-לבך תמיד    ענדם על-גרגרתך
Pro 6:22 כב  בהתהלכך תנחה אתך--    בשכבך תשמר עליך והקיצות    היא תשיחך
Pro 6:23 כג  כי נר מצוה ותורה אור    ודרך חיים תוכחות מוסר
Pro 6:24 כד  לשמרך מאשת רע    מחלקת לשון נכריה
Pro 6:25 כה  אל-תחמד יפיה בלבבך    ואל-תקחך בעפעפיה
Pro 6:26 כו  כי בעד-אשה זונה    עד-ככר-לחם ואשת איש--    נפש יקרה תצוד
Pro 6:27 כז  היחתה איש אש בחיקו    ובגדיו לא תשרפנה
Pro 6:28 כח  אם-יהלך איש על-הגחלים    ורגליו לא תכוינה
Pro 6:29 כט  כן--הבא אל-אשת רעהו    לא-ינקה כל-הנגע בה
Pro 6:30 ל  לא-יבוזו לגנב כי יגנוב--    למלא נפשו כי ירעב
Pro 6:31 לא  ונמצא ישלם שבעתים    את-כל-הון ביתו יתן
Pro 6:32 לב  נאף אשה חסר-לב    משחית נפשו הוא יעשנה
Pro 6:33 לג  נגע-וקלון ימצא    וחרפתו לא תמחה
Pro 6:34 לד  כי-קנאה חמת-גבר    ולא-יחמול ביום נקם
Pro 6:35 לה  לא-ישא פני כל-כפר    ולא-יאבה כי תרבה-שחד