Pro 5:1 א  בני לחכמתי הקשיבה    לתבונתי הט-אזנך
Pro 5:2 ב  לשמר מזמות    ודעת שפתיך ינצרו
Pro 5:3 ג  כי נפת תטפנה שפתי זרה    וחלק משמן חכה
Pro 5:4 ד  ואחריתה מרה כלענה    חדה כחרב פיות
Pro 5:5 ה  רגליה ירדות מות    שאול צעדיה יתמכו
Pro 5:6 ו  ארח חיים פן-תפלס    נעו מעגלתיה לא תדע
Pro 5:7 ז  ועתה בנים שמעו-לי    ואל-תסורו מאמרי-פי
Pro 5:8 ח  הרחק מעליה דרכך    ואל-תקרב אל-פתח ביתה
Pro 5:9 ט  פן-תתן לאחרים הודך    ושנתיך לאכזרי
Pro 5:10 י  פן-ישבעו זרים כחך    ועצביך בבית נכרי
Pro 5:11 יא  ונהמת באחריתך    בכלות בשרך ושארך
Pro 5:12 יב  ואמרת--איך שנאתי מוסר    ותוכחת נאץ לבי
Pro 5:13 יג  ולא-שמעתי בקול מורי    ולמלמדי לא-הטיתי אזני
Pro 5:14 יד  כמעט הייתי בכל-רע--    בתוך קהל ועדה
Pro 5:15 טו  שתה-מים מבורך    ונזלים מתוך בארך
Pro 5:16 טז  יפוצו מעינתיך חוצה    ברחבות פלגי-מים
Pro 5:17 יז  יהיו-לך לבדך    ואין לזרים אתך
Pro 5:18 יח  יהי-מקורך ברוך    ושמח מאשת נעורך
Pro 5:19 יט  אילת אהבים    ויעלת-חן דדיה ירוך בכל-עת    באהבתה תשגה תמיד
Pro 5:20 כ  ולמה תשגה בני בזרה    ותחבק חק נכריה
Pro 5:21 כא  כי נכח עיני יהוה--דרכי-איש    וכל-מעגלתיו מפלס
Pro 5:22 כב  עוונתיו--ילכדנו את-הרשע    ובחבלי חטאתו יתמך
Pro 5:23 כג  הוא--ימות באין מוסר    וברב אולתו ישגה