Allepo, Proverbs, Chapter 03

Pro 3:1 א  בני תורתי אל-תשכח ומצותי יצר לבך
Pro 3:2 ב  כי ארך ימים ושנות חיים--    ושלום יוסיפו לך
Pro 3:3 ג  חסד ואמת    אל-יעזבך קשרם על-גרגרותיך    כתבם על-לוח לבך
Pro 3:4 ד  ומצא-חן ושכל-טוב--    בעיני אלהים ואדם
Pro 3:5 ה  בטח אל-יהוה בכל-לבך    ואל-בינתך אל-תשען
Pro 3:6 ו  בכל-דרכיך דעהו    והוא יישר ארחתיך
Pro 3:7 ז  אל-תהי חכם בעיניך    ירא את-יהוה וסור מרע
Pro 3:8 ח  רפאות תהי לשרך    ושקוי לעצמותיך
Pro 3:9 ט  כבד את-יהוה מהונך    ומראשית כל-תבואתך
Pro 3:10 י  וימלאו אסמיך שבע    ותירוש יקביך יפרצו
Pro 3:11 יא  מוסר יהוה בני אל-תמאס    ואל-תקץ בתוכחתו
Pro 3:12 יב  כי את אשר יאהב יהוה    יוכיח וכאב    את-בן ירצה
Pro 3:13 יג  אשרי אדם מצא חכמה    ואדם יפיק תבונה
Pro 3:14 יד  כי טוב סחרה מסחר-כסף    ומחרוץ תבואתה
Pro 3:15 טו  יקרה היא מפניים (מפנינים)    וכל-חפציך לא ישוו-בה
Pro 3:16 טז  ארך ימים בימינה    בשמאולה עשר וכבוד
Pro 3:17 יז  דרכיה דרכי-נעם    וכל-נתיבותיה שלום
Pro 3:18 יח  עץ-חיים היא למחזיקים בה    ותמכיה מאשר
Pro 3:19 יט  יהוה--בחכמה יסד-ארץ    כונן שמים בתבונה
Pro 3:20 כ  בדעתו תהומות נבקעו    ושחקים ירעפו-טל
Pro 3:21 כא  בני אל-ילזו מעיניך    נצר תשיה ומזמה
Pro 3:22 כב  ויהיו חיים לנפשך    וחן לגרגרתיך
Pro 3:23 כג  אז תלך לבטח דרכך    ורגלך לא תגוף
Pro 3:24 כד  אם-תשכב לא-תפחד    ושכבת וערבה שנתך
Pro 3:25 כה  אל-תירא מפחד פתאם    ומשאת רשעים כי תבא
Pro 3:26 כו  כי-יהוה יהיה בכסלך    ושמר רגלך מלכד
Pro 3:27 כז  אל-תמנע-טוב מבעליו--    בהיות לאל ידיך (ידך) לעשות
Pro 3:28 כח  אל-תאמר לרעיך (לרעך) לך ושוב--ומחר אתן    ויש אתך
Pro 3:29 כט  אל-תחרש על-רעך רעה    והוא-יושב לבטח אתך
Pro 3:30 ל  אל-תרוב (תריב) עם-אדם חנם--    אם-לא גמלך רעה
Pro 3:31 לא  אל-תקנא באיש חמס    ואל-תבחר בכל-דרכיו
Pro 3:32 לב  כי תועבת יהוה נלוז    ואת-ישרים סודו
Pro 3:33 לג  מארת יהוה בבית רשע    ונוה צדיקים יברך
Pro 3:34 לד  אם-ללצים הוא-יליץ    ולעניים (ולענוים) יתן-חן
Pro 3:35 לה  כבוד חכמים ינחלו    וכסילים מרים קלון