Pro 2:1 א  בני אם-תקח אמרי    ומצותי תצפן אתך
Pro 2:2 ב  להקשיב לחכמה אזנך    תטה לבך לתבונה
Pro 2:3 ג  כי אם לבינה תקרא    לתבונה תתן קולך
Pro 2:4 ד  אם-תבקשנה ככסף    וכמטמונים תחפשנה
Pro 2:5 ה  אז--תבין יראת יהוה    ודעת אלהים תמצא
Pro 2:6 ו  כי-יהוה יתן חכמה    מפיו דעת ותבונה
Pro 2:7 ז  וצפן (יצפן) לישרים תושיה    מגן להלכי תם
Pro 2:8 ח  לנצר ארחות משפט    ודרך חסידו ישמר
Pro 2:9 ט  אז--תבין צדק ומשפט    ומישרים כל-מעגל-טוב
Pro 2:10 י  כי-תבוא חכמה בלבך    ודעת לנפשך ינעם
Pro 2:11 יא  מזמה תשמר עליך    תבונה תנצרכה
Pro 2:12 יב  להצילך מדרך רע    מאיש מדבר תהפכות
Pro 2:13 יג  העזבים ארחות ישר--    ללכת בדרכי-חשך
Pro 2:14 יד  השמחים לעשות רע    יגילו בתהפכות רע
Pro 2:15 טו  אשר ארחתיהם עקשים    ונלוזים במעגלותם
Pro 2:16 טז  להצילך מאשה זרה    מנכריה אמריה החליקה
Pro 2:17 יז  העזבת אלוף נעוריה    ואת-ברית אלהיה שכחה
Pro 2:18 יח  כי שחה אל-מות ביתה    ואל-רפאים מעגלתיה
Pro 2:19 יט  כל-באיה לא ישובון    ולא-ישיגו ארחות חיים
Pro 2:20 כ  למען--תלך בדרך טובים    וארחות צדיקים תשמר
Pro 2:21 כא  כי-ישרים ישכנו-ארץ    ותמימים יותרו בה
Pro 2:22 כב  ורשעים מארץ יכרתו    ובוגדים יסחו ממנה