Allepo, Psalms, Chapter 148

Psa 148:1 א  הללו-יה הללו את-יהוה מן-השמים    הללוהו במרומים
Psa 148:2 ב  הללוהו כל-מלאכיו    הללוהו כל-צבאו
Psa 148:3 ג  הללוהו שמש וירח    הללוהו כל-כוכבי אור
Psa 148:4 ד  הללוהו שמי השמים    והמים אשר מעל השמים
Psa 148:5 ה  יהללו את-שם יהוה    כי הוא צוה ונבראו
Psa 148:6 ו  ויעמידם לעד לעולם    חק-נתן ולא יעבור
Psa 148:7 ז  הללו את-יהוה מן-הארץ--    תנינים וכל-תהמות
Psa 148:8 ח  אש וברד שלג וקיטור    רוח סערה עשה דברו
Psa 148:9 ט  ההרים וכל-גבעות    עץ פרי וכל-ארזים
Psa 148:10 י  החיה וכל-בהמה    רמש וצפור כנף
Psa 148:11 יא  מלכי-ארץ וכל-לאמים    שרים וכל-שפטי ארץ
Psa 148:12 יב  בחורים וגם-בתולות    זקנים עם-נערים
Psa 148:13 יג  יהללו את-שם יהוה--    כי-נשגב שמו לבדו הודו    על-ארץ ושמים
Psa 148:14 יד  וירם קרן לעמו    תהלה לכל-חסידיו-- לבני ישראל    עם קרבו הללו-יה