Allepo, Psalms, Chapter 147

Psa 147:1 א  הללו-יה כי-טוב זמרה אלהינו--    כי-נעים נאוה תהלה
Psa 147:2 ב  בונה ירושלם יהוה    נדחי ישראל יכנס
Psa 147:3 ג  הרפא לשבורי לב    ומחבש לעצבותם
Psa 147:4 ד  מונה מספר לכוכבים    לכלם שמות יקרא
Psa 147:5 ה  גדול אדונינו ורב-כח    לתבונתו אין מספר
Psa 147:6 ו  מעודד ענוים יהוה    משפיל רשעים עדי-ארץ
Psa 147:7 ז  ענו ליהוה בתודה    זמרו לאלהינו בכנור
Psa 147:8 ח  המכסה שמים בעבים--    המכין לארץ מטר המצמיח הרים    חציר
Psa 147:9 ט  נותן לבהמה לחמה    לבני ערב אשר יקראו
Psa 147:10 י  לא בגבורת הסוס יחפץ    לא-בשוקי האיש ירצה
Psa 147:11 יא  רוצה יהוה את-יראיו--    את-המיחלים לחסדו
Psa 147:12 יב  שבחי ירושלם את-יהוה    הללי אלהיך ציון
Psa 147:13 יג  כי-חזק בריחי שעריך    ברך בניך בקרבך
Psa 147:14 יד  השם-גבולך שלום    חלב חטים ישביעך
Psa 147:15 טו  השלח אמרתו ארץ    עד-מהרה ירוץ דברו
Psa 147:16 טז  הנתן שלג כצמר    כפור כאפר יפזר
Psa 147:17 יז  משליך קרחו כפתים    לפני קרתו מי יעמד
Psa 147:18 יח  ישלח דברו וימסם    ישב רוחו יזלו-מים
Psa 147:19 יט  מגיד דברו ליעקב    חקיו ומשפטיו לישראל
Psa 147:20 כ  לא עשה כן לכל-גוי--    ומשפטים בל-ידעום הללו-יה