Allepo, Psalms, Chapter 145

Psa 145:1 א  תהלה לדוד ארוממך אלוהי המלך    ואברכה שמך לעולם ועד
Psa 145:2 ב  בכל-יום אברכך    ואהללה שמך לעולם ועד
Psa 145:3 ג  גדול יהוה ומהלל מאד    ולגדלתו אין חקר
Psa 145:4 ד  דור לדור ישבח מעשיך    וגבורתיך יגידו
Psa 145:5 ה  הדר כבוד הודך--    ודברי נפלאתיך אשיחה
Psa 145:6 ו  ועזוז נוראתיך יאמרו    וגדלותיך (וגדלתך) אספרנה
Psa 145:7 ז  זכר רב-טובך יביעו    וצדקתך ירננו
Psa 145:8 ח  חנון ורחום יהוה    ארך אפים וגדל-חסד
Psa 145:9 ט  טוב-יהוה לכל    ורחמיו על-כל-מעשיו
Psa 145:10 י  יודוך יהוה כל-מעשיך    וחסידיך יברכוכה
Psa 145:11 יא  כבוד מלכותך יאמרו    וגבורתך ידברו
Psa 145:12 יב  להודיע לבני האדם--גבורתיו    וכבוד הדר מלכותו
Psa 145:13 יג  מלכותך מלכות כל-עלמים    וממשלתך בכל-דור ודר
Psa 145:14 יד  סומך יהוה לכל-הנפלים    וזוקף לכל-הכפופים
Psa 145:15 טו  עיני-כל אליך ישברו    ואתה נותן-להם את-אכלם בעתו
Psa 145:16 טז  פותח את-ידך    ומשביע לכל-חי רצון
Psa 145:17 יז  צדיק יהוה בכל-דרכיו    וחסיד בכל-מעשיו
Psa 145:18 יח  קרוב יהוה לכל-קראיו--    לכל אשר יקראהו באמת
Psa 145:19 יט  רצון-יראיו יעשה    ואת-שועתם ישמע ויושיעם
Psa 145:20 כ  שומר יהוה את-כל-אהביו    ואת כל-הרשעים ישמיד
Psa 145:21 כא  תהלת יהוה ידבר-פי    ויברך כל-בשר שם קדשו--לעולם ועד