Allepo, Psalms, Chapter 144

Psa 144:1 א  לדוד  ברוך יהוה צורי--    המלמד ידי לקרב אצבעותי    למלחמה
Psa 144:2 ב  חסדי ומצודתי    משגבי ומפלטי-לי מגני ובו חסיתי    הרודד עמי תחתי
Psa 144:3 ג  יהוה--מה-אדם ותדעהו    בן-אנוש ותחשבהו
Psa 144:4 ד  אדם להבל דמה    ימיו כצל עובר
Psa 144:5 ה  יהוה הט-שמיך ותרד    גע בהרים ויעשנו
Psa 144:6 ו  ברוק ברק ותפיצם    שלח חציך ותהמם
Psa 144:7 ז  שלח ידיך ממרום    פצני והצילני ממים רבים מיד בני נכר
Psa 144:8 ח  אשר פיהם דבר-שוא    וימינם ימין שקר
Psa 144:9 ט  אלהים--שיר חדש אשירה לך    בנבל עשור אזמרה-לך
Psa 144:10 י  הנותן תשועה למלכים    הפוצה את-דוד עבדו--מחרב רעה
Psa 144:11 יא  פצני והצילני    מיד בני-נכר אשר פיהם דבר-שוא    וימינם ימין שקר
Psa 144:12 יב  אשר בנינו כנטעים--    מגדלים בנעוריהם בנותינו כזוית--    מחטבות תבנית היכל
Psa 144:13 יג  מזוינו מלאים--    מפיקים מזן אל-זן צאוננו מאליפות מרבבות--    בחוצותינו
Psa 144:14 יד  אלופינו מסבלים    אין-פרץ ואין יוצאת ואין צוחה ברחבתינו
Psa 144:15 טו  אשרי העם שככה לו    אשרי העם שיהוה אלהיו